Филипче најави законско решение на СДСМ: Три денари повеќе по килограм за лозарите

СДСМ ќе понуди законско решение коешто се темели на барањата на лозарите, три денари повеќе по килограм произведено грозје. И законскиот предлог утре или задутре ќе го поднесеме во Собранието,  изјави денеска претседателот на СДСМ, Венко Филипче, одговарајќи на новинарско прашање на настанот посветен на откривање на муралот во чест на 40 години „Бушава азбука“.

-Искрено се надевам, еве го контекстот на конструктивноста, дека власта ќе има слух и дека ќе ги поддржи лозарите, затоа што станува збор за една област од којашто живеат над 10.000 луѓе во Македонија, додаде тој.

Филипче потенцираше дека владата ги оставила лозарите без поддршка, штитејќи го крупниот бизнис.

-Тоа дека лозарите не се задоволни, јас вчера го слушнав од нив самите. Тие кажаа дека цената на откуп на грозјето е недоволна. Владата, во однос на минатата година, откупната цена ја зголемила за само половина денар, притоа не ги вкалкулирала поголемите трошоци, нафта, работна рака, прскање на лозјата и други трошоци. Дополнително, не се калкулираат и двата денари субвенција по килограм што лани нашата влада ги даваше на лозарите. Значи практично, откупната цена оваа година е многу пониска, рече Филипче.

Тој додаде дека лозарите имаат забелешка, којашто, како што рече е на место, зошто се дава субвенција од два денари по литар вино на винарии за ланското грозје.

-Излегува дека е заштитен само крупниот бизнис, големите компании. Нема никаква логика, рече претседателот на СДСМ.