ЕУ би можела да се „навлече“ на кинеските батерии

На Европската унија и се заканува зависност од литиум-јонски батерии од Кина.

До 2030 година, Европската унија би можела да стане зависна од увозот на литиум-јонски батерии и горивни ќелии од Кина, како што беше зависна од руските извори на енергија пред почетокот на војната во Украина, се предупредува во документот, кој ќе биде основа за претстојната дискусија на лидерите на ЕУ за економската безбедност во Гранада, Шпанија.

Според агенцијата Ројтерс, која е запознаена со овој документ, Европската унија ќе мора да складира енергија на различни начини за да ја постигне својата климатска цел за нулта емисија на јаглерод до 2050 година, што драматично ќе ја зголеми побарувачката за литиум-јонски батерии, горивни ќелии и електролизери.

Побарувачката за овој вид стоки во наредните години ќе се зголеми за 10 до 30 пати, предупредуваат авторите на документот, а ЕУ веќе е значително зависна од Кина, од која увезува литиум-јонски батерии и горивни ќелии.

Ова не се единствените области во кои Европската унија е ранлива.

„Слично сценарио би можело да се случи на полето на дигиталните технологии, со прогнози кои сугерираат дека побарувачката за дигитални уреди како сензори, дронови, сервери за бази на податоци и мрежи за податоци нагло ќе се зголеми во оваа деценија“, се вели во документот.

Авторите тврдат дека ЕУ има „релативно силна позиција“ на полето на мрежите за пренос на податоци, но во исто време „покажува значителни слабости“ во другите споменати сфери.