Две рачни бомби фрлени врз поштата на северот на Косово, една експлодирала

 Во зградата на Поштата на Косово во Звечане, на северот од земјата, вечерва по полноќ биле фрлени две експлозивни направи, од кои едната експлодирала предизвикувајќи материјална штета, јавува Anadolu.

Косовската полиција соопшти дека е активирана една рачна бомба, но нема повредени. Експлозијата се случила 20 минути по полноќ.

„Надлежните полициски единици по пристигнувањето на местото на настанот забележале дека во зградата има уште една неексплодирана граната. Локацијата е обезбедена, додека жителите привремено се евакуирани. Специјализирана единица за ракување со експлозив контролирано ја активирала гранатата“, се вели во соопштението на косовската полиција.

Предизвикување општа опасност

Антитерористичката единица интензивно работи на откривање на сторителите на нападот, а државниот обвинител нареди случајот да се третира како „предизвикување општа опасност“.

Косовската полиција остро ги осуди „овие опасни дејствија и апелираше до граѓаните да соработуваат со властите за да помогнат во откривањето на сторителите“.

Нападот во ноември на каналот Ибар-Лепенац на северот на Косово, со кој се снабдуваат со вода неколку водоводи и термоелектрани на Косово, е последниот инцидент од ваков тип регистриран на територијата на Косово.