Дури 548 од 655 од активните инфекции се во четири градови

Продолжениот прв бран од епидемијата на корона вирусот донесе драматично концентрирање на новите инфекции во само одредени региони во Македонија. Во четири градови – Скопје, Штип, Тетово и Куманово – се дури 83,6 отсто од вкупниот број активни случаи. Бројот на активните случаи во земјава денеска е 655, а од нив во четирите градови се 548.

Од нив најмногу се во Скопје – 338, па во Тетово 86, Штип 69 и Куманово 55. Вкупниот број на заболени (во кои влегуваат и оздравени и починати) во овие четири градови е 1.732 од 2.391. И процентот на овие бројки е голем – 72,4. Тоа значи дека здравствените власти требало повеќе активности да вклучат во запирањето на ширењето на овие жаришта преку познати или сомнителни кластери, а во тоа главна помош требаше да имаат од полициските служби кои ќе помогнат во придржувањето на мерките, како што се социјалното дистанцирање, носењето маски и забраната за собирање во групи.

Најголемиот процент на сегашни активни случаи од бројот на вкупните инфицирани има во Штип – дури 66 отсто (64 активни и 104 заболени). Жариштето од автобусите за превоз на текстилните работнички драматично ја крена бројката на инфицираните. Другите проценти се помали: во Скопје е 36,4, во Куманово 11,7, во Прилеп – кој беше едно од првите поголеми жаришта – е 14,2, во Велес 21,9, во Тетово 37,2…

Во 11 градови сега воопшто нема заболени (меѓу нив е и првото големо жариште – Дебар), од 1 до 10 заболени има во 12 градови, од 11 до 20 заболени има само во еден град, а од 21 до 30 активни пациенти има само во два града.

Овие бројки покажуваат дека драматичниот скок на новоинфицираните е регионализиран, со тоа што Скопје (особено неколку општини во него) сега е главното жариште на инфекцијата. Главниот град е мегалополис за македонски услови и претставува огромна задача за здравствените и другите власти инфекцијата да се стави под контрола. (Н.В.)