(Видео) Драматично на границата меѓу Полска и Белорусија – мигрантите се обидуваат да се пробијат

Префрлањето на мигрантите од Блискиот Исток на границата со Полска е дел од хибридната војна на Александар Лукашенко

Полска во понеделникот ја засили безбедноста на границата со Белорусија по извештаите дека стотици мигранти се упатуваат кон граничниот премин Кузница-Брузги.

Полското Министерство за внатрешни работи соопшти дека еден обид за преминување на границата во понеделникот бил одбиен. Нормалниот сообраќај на камиони преку граничниот премин наводно бил запрен.

„Подготвени сме да ги браниме границите на Полска“, напиша на Твитер полскиот министер за одбрана Мариуш Блашчак, кој рече дека повеќе од 12.000 војници се испратени на границата. Видео клип од Министерството за одбрана покажа стотици луѓе собрани на белоруската страна од граничната ограда.

Полската влада во понеделник треба да одржи кризен состанок.

Полска, заедно со Литванија и Латвија, забележаа илјадници обиди за преминување преку границата од август – дел од она што се нарекува „хибридна војна“ од страна на претседателот Александар Лукашенко. Тој е обвинет за обид да ја поткопа ЕУ откако Брисел воведе санкции против него и неговите главни сојузници по бруталното задушување на продемократските демонстранти по минатогодишните претседателски избори.

Луѓето летаат за Минск од Блискиот Исток, а потоа наводно им помагаат белоруските власти да стигнат до границата со ЕУ. Напорите на блокот да ги запре ваквите летови имаа ограничен успех.

Полска прогласи вонредна состојба во појас широк 3 километри долж границата со Белорусија, спречувајќи ги новинарите да работат таму. Тоа го отежнува да се утврди што се случува во зоната, но има многу онлајн извештаи за голем број луѓе кои се движат кон границата.

„Најголемиот масовен обид за преминување на полската граница штотуку започна“, напиша на Твитер Станислав Жарин, портпарол на полскиот министер за специјални служби.

Државниот граничен комитет на Белорусија соопшти дека голема група бегалци се движела по автопатот кон полската граница.

Полска инсистира сама да се справи со кризата, одбивајќи понуди за помош од Фронтекс, граничната агенција на ЕУ, со седиште во Варшава.

„Фронтекс има 1.300 службеници. Полската гранична стража има 16.000 лица, помогнати од 10.000 војници и полицајци“, напиша на Твитер Мачеј Вашик, заменик министер за внатрешни работи.

Европската комисија во понеделникот ги нарече случувањата „загрижувачки“, а портпаролот рече дека тие „се чини дека се дел од обидите на Лукашенко да ја дестабилизира ЕУ и нејзините земји-членки и да го одвлече вниманието од континуираното бесрамно непочитување на човековите права и тековната репресија врз населението во земјата“.

Доналд Туск, лидер на опозициската партија Граѓанска платформа, рече дека Полска треба да добие помош од своите сојузници во НАТО со повикување на член кој повикува на консултации доколку територијата на членка на алијансата е под закана.

Полските граничари велат дека од 1 август забележале повеќе од 30.000 обиди за илегално преминување на границата.

Полска се најде на удар на критики затоа што ги враќа мигрантите назад во Белорусија и не им дозволува да поднесат барања за азил. Најмалку девет смртни случаи се пријавени во или во близина на затворената гранична зона. Полските активисти кои работат на терен за да им помогнат на мигрантите да се загреат и со храна, велат дека бројот на смртни случаи може да биде многу поголем.

И покрај големото присуство долж границата, стотици луѓе влегуваат во земјата; Германија објави нагло зголемување на бројот на пресретнати мигранти на нејзината граница со Полска. Кон крајот на октомври, Германија предложи одржување заеднички патроли на германско-полска страна за да се спротивстави на порастот на илегалните пристигнувања.