Дождот го отежнува закрепнувањето по земјотресот во Мјанмар во кој загинаа повеќе од 3.500 луѓе

Бројот на загинати во земјотресот со јачина од 7,7 степени според Рихтеровата скала што го погоди Мјанмар пред 10 дена се искачи на најмалку 3.514, а уште 210 лица се уште се водат како исчезнати, покажуваат податоците објавени денеска од воената влада на Мјанмар.

Најмногу жртви се пријавени во и околу Мандалеј, вториот по големина град во земјата, каде што се потврдени над 2.100 смртни случаи.

Напорите за помош се сериозно отежнати од тековните обилни врнежи и ветер, кои ги оштетија шаторите и импровизираните медицински установи поставени од меѓународни тимови. Метеоролозите предупредуваат на зголемени ризици од поплави и лизгање на земјиштето како што се приближува сезоната на дождови, пренесе ДПА.

Властите ги прогласија операциите за пребарување и спасување за завршени, префрлајќи го фокусот на закрепнување и чистење. Извештаите покажуваат дека мртовечниците се преполни, со масовно кремирање на отворени површини.

Ситуацијата ја компликуваат чести последователни потреси и прекин на интернетот, кои ја нарушуваат комуникацијата и координацијата на помошта.

Штетата во некои области е катастрофална, со уништени до 80 отссто од инфраструктурата во градот Сагаинг, според весникот The Irrawaddy. Хуманитарната ситуација останува многу тешка, особено за ранливите популации во нацијата погодена со конфликти.