Доларот на највисоко ниво во последните девет и пол месеци

На светските девизни пазари, доларот се искачи на највисоко ниво од почетокот на ноември минатата година, поддржан од изгледите за скорешно затегнување на американската монетарна политика, но инвеститорите исто така го купуваат како сигурно засолниште, бидејќи се плашат дека новото ширење на Ковид – 19 ќе го забави глобалното закрепнување, пренесува бизнис порталот СЕЕбиз.

Индексот на доларот, кој го мери курсот на доларот во однос на другите шест главни светски валути, минатата недела порасна за 1 отсто, на 93.491 поени, што претставува најголема неделна добивка во последните два месеци. Во текот на неделата, исто така, достигна 93,73 поени, највисоко ниво во изминатите 9,5 месеци.

Во исто време, курсот на доларот во однос на јапонската валута зајакна за 0,2 проценти, на 109,80 јени.

Американската валута, исто така, порасна за 0,8 отсто во однос на европската валута, достигнувајќи 1,1697 долари на крајот на неделата, близу 9,5-месечното најниско ниво од 1,1665 долари.

„Падот на берзите и падот на цените за стратешките производи значат само едно – посилен долар додека инвеститорите бараат засолниште за својот капитал“, посочува Џереми Томсон -Кук, економист во Equals Money.

Имено, доларот ја поддржува загриженоста на инвеститорите дека ширењето на делта варијантата на Ковид-19 може да му наштети на растот на глобалната економија токму во време кога водечките централни банки се подготвуваат да започнат монетарно затегнување, со што ќе заврши ерата на евтини пари. Во исто време, тие очекуваат дека растот на најголемата светска економија ќе биде посилен во споредба со другите водечки економии, па дури и од таа гледна точка, доларот изгледа поатрактивен за инвестиции отколку другите валути.

Записникот од последната сесија на ФЕД, објавен во средата, покажува дека монетарните службеници размислуваат веќе оваа година да ја намалат програмата за откуп на обврзници.

Службениците на ФЕД ќе се соберат на редовниот годишен состанок во Џексон Хол следната недела, а инвеститорите се надеваат дека ќе добијат попрецизни индиции за точно кога ќе започне монетарното заострување – веќе во септември или подоцна.

„На краток рок, очекуваме доларот да порасне уште малку. Веруваме дека силниот раст на американската економија во споредба со другите, најважните економии во светот и постепеното заострување на монетарната политика ќе го поддржат растот на доларот“, рече Џонас Голтерман, аналитичар во Капитал економикс.