Доаѓа една од најубавите небесни сцени, целосно затемнување и суперкрвава месечина
Една од најневеројатните сцени пристигнува на небото рано наутро во понеделник – таканаречената суперкрвава Месечина. Ова е единственото затемнување на Месечината оваа година кое ќе биде видливо и од нашиот регион.
Во единственото целосно затемнување на Месечината во годината, Земјата ќе дојде меѓу Сонцето и Месечината. Целосно паѓајќи во Земјината сенка, Месечината полека ќе се затемни пред да стане темноцрвена.
Настанот ќе биде видлив со голо око пред зори во понеделник во поголемиот дел од Европа. Америка ќе добие одличен поглед на тој небесен спектакл во недела навечер, пишува Дневник.хр.
Во Хрватска, Месечината ќе почне да навлегува во Земјината полусенка во понеделник рано наутро околу 3:30 часот (ќе почне да свети помалку), а ќе влезе во полната сенка на Земјата околу 4:30 часот (ќе почне да добива црвеникава боја). Ова ќе трае до околу 05:30 часот кога Месечината заоѓа во нашиот регион, па нема да можеме да го видиме целиот тек на затемнувањето на Месечината, вели Доријан Божичевиќ, генерален секретар на Хрватската астрономска унија, што го пренесува порталот Universitas.
Месечината ќе изгледа поголема од вообичаено бидејќи ќе биде на најблиската точка до Земјата во нејзината орбита, па оттука и името супермесечина. На северната хемисфера на Земјата, полната месечина во мај често се нарекува Цветна Месечина, бидејќи се совпаѓа со пролетните цвеќиња.
Единствената сончева светлина што ќе стигне до Месечината за време на целосно затемнување ќе помине низ атмосферата на Земјата. Таа светлина ќе биде крваво црвена, од сите изгрејсонца и зајдисонца на Земјата рефлектирани на површината на Месечината, објаснува д-р Грегори Браун, астроном од Кралската опсерваторија во Гринич, Лондон.
Американците ќе бидат почестени со полн спектакл во траење од 84 минути.
Секако, најдобрата точка за да се види ова затемнување е местото кое ретко кој имал среќа воопшто да го посети, а тоа е самата Месечина.
Да бевте астронаут кој стоеи на Месечината и гледа назад во Земјата, ќе видевте црвен прстен кој се движи околу надворешниот дел на нашата планета, објаснува д-р Браун. (Извор: BBC)