Десетици илјади „патриоти“ во Варшава славеа илјада години од Кралството Полска
Маршот го организираше националистичката партија Право и правда
Десетици илјади Полјаци денеска минаа низ центарот на Варшава на патриотски марш повикан од најсилната опозициска партија Право и правда и нејзиниот лидер Јарослав Качињски за заедно да ја прослават 1.000-годишнината од крунисувањето на Болеслав I Храбриот за крал на Полска и 500 години откако Војводството Прусија стана феуд на полската круна.
Маршот, кој започна со обид да се урне рекордот по број на парови кои танцуваат на полонеза, кулминираше со обраќањето на главниот говорник, кандидатот на полските конзервативни популисти на претседателските избори на 18 мај, директорот на Институтот за народна меморија, Карол Навроцки.
„Не можеме да дозволиме да ни ја ограбат слободата, да ни го предадат суверенитетот! Сакаме Полска која се грижи за Полјаците, да живеат добро. Сакаме Полска која има амбиции да биде голема. Илјада години од круната денес ни викаат дека Полјаците никогаш нема да подлегнат на очајот и нема да се откажат од својата слобода“, рече тој кого насобраните го пречекаа со извиците „Кралот Карол!“.
Со државни знамиња во рацете, извикувајќи „Полска е тука!“, „Бог, чест и татковина!“ се извикуваа пароли против проевропската коалициска влада на премиерот Доналд Туск: „Црвената врана никогаш нема да го победи орелот!“ и „Ова е Полска, а не Брисел“ Според проценките на организаторите, на маршот учествувале 100.000 луѓе, додека официјалните проценки на градските власти говорат за 20.000 жители на Варшава, заедно со Полјаците кои партијата ги донела во 200 автобуси од цела Полска, што би биле уште 10.000.
На прашањата на новинарите на полските медиуми, учесниците на маршот објаснија дека биле таму за по 500 години Полјаците да не бидат принудени да бидат „вазали на Германија“ и затоа што наводно владата на премиерот Туск не ја организира прославата на 1.000 години од полската круна бидејќи тоа е „германската влада“.
„И ние сме патриоти, ние не сме руски Германци“, објасни еден од учесниците на маршот на новинарот од весникот „Газета виборча“.
„Секој црвено ѓубре гласа за Рафал Тржасковски“, е еден од слоганите против кандидатот на Граѓанската коалиција на Туск за претседател на Полска, популарниот либерален градоначалник на Варшава.
Премиерот Доналд Туск во промотивниот клип на социјалните мрежи „1.000 причини да се гордееме“ ги покани Полјаците заедно да прослават 1.000 години од Кралството Полска на 26 април во Варшава.
Анкетите покажуваат дека на претседателските избори по заминувањето на актуелниот претседател Анджеј Дуда од партијата Право и правда, има Тржасковски. Тој и во првиот и во вториот круг има предност од најмалку 10 отсто, кој и да е противкандидат.
Не е сигурно дека во вториот круг ќе влезе кандидатот на конзервативните популисти, Навроцки, поради речиси подеднаква поддршка за кандидатот на радикалната националистичка Конфедерација, Славомир Менцен. (Бета)