Човек обвинет за упадот во Капитол хил бара азил во Белорусија

Еван Нојман (48), човек на листата на барани лица на ФБИ за напад на полицијата за време на бунтот во американскиот Капитол хил на 6 јануари оваа година, побарал азил во Белорусија, објави државната телевизија на поранешната советска држава.

Нојман е баран од САД под обвинение за насилно влегување и предизвикување немири околу Капитол хил, како и за напад, отпор и попречување на спроведувањето на законот за време на граѓански немири. Нојман тврди дека обвинувањата се „неосновани“.

Тој, наводно, ја продал својата куќа во Калифорнија оваа пролет и се претпоставува дека се преселил во Украина за да избегне апсење, објави летово Еј-Би-Си.

„Судејќи според неговата приказна, Нојман е истиот тип на обичен Американец чии продавници беа запалени од активисти на Black Lives Matter“, рече водителот на ТВ каналот Белорусија 1, повторувајќи го вообичаениот став што може да се слушне на руската државна телевизија, пренесува moscowtimes. .com.

Нојман „бараше правда и поставуваше срамни прашања“ по изборите во САД во 2020 година, кои беа оспорени од поранешниот претседател Доналд Трамп, додаде водителот, „но изгуби речиси сè и затоа е прогонуван од американската влада“.

Белоруските погранични власти го приведоа Нојман на границата со Украина на 15 август, објави каналот Белорусија 1.

„Оваа ситуација не само што никогаш порано не се случила, туку беше тешко да се замисли“, рече репортерот на каналот во делот насловен „Збогум Америка!“

Во интервјуто, Нојман се сеќава како преминал мочуришни шуми и се сретнал со диви свињи и змии на своето патување од Украина до Белорусија. Белорусија 1 објави дека Нојман ги напуштил САД за Италија во март, потоа заминал со воз за Швајцарија и отишол во Германија и Полска пред да се насели во западна Украина, каде што изнајмил стан на четири месеци.

Нојман рече дека забележал дека украинските безбедносни служби го „следеле“ две недели по неговиот престој, што го навело да се пресели во соседна Белорусија и да побара азил. Белоруските миграциски власти одбија да го коментираат случајот, повикувајќи се на доверливоста на личните податоци, објави денеска руската државна агенција РИА Новости.

Најмалку тројца американски државјани поднеле барање за азил во Белорусија во 2021 година, додава агенцијата.