Четиринаесет деца и нивен учител убиени во Тексас
Напаѓачот е убиен. Има ранети, некои во критична состојба
УВАЛДЕ, Тексас – Четиринаесет деца и еден наставник загинаа во пукање во основно училиште во Тексас во вторникот, а 18-годишниот напаѓач е мртов, изјави гувернерот Грег Абот.
Абот рече дека локален човек отворил оган во основното училиште „Роб“ во Увалде, околу 140 километри западно од Сан Антонио. Тоа беше најсмртоносното пукање во училиште во историјата на Тексас и се случи четири години откако вооружен маж смртно застрела 10 луѓе во средното училиште „Санта Фе“ во областа Хјустон.
„Тој застрела и уби, ужасно, неразбирливо, 14 ученици и уби еден наставник“, рече гувернерот, додавајќи дека двајца полицајци биле застрелани и ранети, но се очекувало да преживеат.
Напаѓачот бил жител на заедницата и влегол во училиштето со пиштол, а можеби и пушка и отворил оган, рече Абот. Тој рече дека напаѓачот најверојатно бил убиен од полицајците кои реагирале, но дека настаните сè уште се истражуваат. Абот го идентификува напаѓачот како Саладор Рома, ученик во средно училиште.
Засега не е јасно колку луѓе, покрај загинатите, се повредени во престрелката. Претходно, Меморијалната болница во Увалде соопшти дека таму се однесени 13 деца. Друга болница објави дека 66-годишна жена е во критична состојба.
Основното училиште „Роб“ има нешто помалку од 600 ученици.
Силно полициско присуство го опколи училиштето во вторникот попладне, при што полицајци во тешки елеци го пренасочуваа сообраќајот, а агенти на ФБИ доаѓаа и заминуваа од зградата.
Прес секретарот на Белата куќа, Карин Жан-Пјер, рече дека претседателот Џо Бајден бил информиран за пукањето во училиштето во „Ер Форс 1“ додека се враќа од петдневното патување во Азија и ќе продолжи да добива ажурирања. Жан-Пјер рече дека Бајден ќе даде забелешки во вторник навечер во Белата куќа.
Престрелката во Тексас се случи помалку од две недели откако вооружен маж отвори оган во супермаркет во Бафало, Њујорк, убивајќи 10 црни купувачи и работници, што официјалните лица го опишаа како злосторство од омраза.
Увалде е дом на околу 16.000 луѓе. Градот е на околу 120 километри од границата со Мексико. (АП)