Царините за челик од ЕУ го вклучија алармот во автомобилската индустрија

Одлуката на Европската Унија да ги зголеми царините за челик и драстично да ги намали квотите за увоз предизвика голема загриженост во Обединетото Кралство и поттикна незадоволство кај производителите на автомобили низ целиот континент, пишува CNBC.

Во вторник, Европската Унија објави планови за намалување на квотите без царина за увезен челик за 47 проценти во споредба со 2024 година, додека царините за целиот вишок увоз се зголемуваат од 25 на дури 50 проценти. Европската комисија соопшти дека овие мерки се одговор на повиците од работниците, индустријата и неколку земји-членки „да се обезбеди силна и трајна заштита на челичната индустрија на ЕУ, со цел зачувување на работните места во ЕУ и поддршка на секторот во неговите напори за декарбонизација“.

Новите царини предизвикаа бран протести во Велика Британија, чија челична индустрија веќе се соочува со низа проблеми, од затворање на фабрики и илјадници загуби на работни места до американски царини од 25 проценти за извоз. „Ова е можеби најголемата криза со која се соочила британската челична индустрија“, изјави во вторник Гарет Стејс, генерален директор на UK Steel.

„Владата мора да стори сè што е можно за да ги искористи нашите трговски односи со Европската Унија за да ги обезбеди националните квоти на Велика Британија или да се соочи со потенцијална катастрофа“, додаде тој.

Емили Савич, директорка и виш аналитичар во RSM UK, изјави за CNBC дека соопштението од ЕУ претставува „значајна закана“ за британската челична индустрија. „ЕУ учествува со околу 80 проценти во извозот на челик од Велика Британија, па затоа овие царини ризикуваат да го скратат пристапот до најголемиот и стратешки најважен пазар во Велика Британија во време кога секторот е веќе под огромен притисок од глобалната конкуренција и растечките трошоци за енергија“, објасни таа за CNBC во среда.

Потегот на ЕУ следи по слични мерки што веќе ги воведоа САД и Канада за да го спречат увозот на поевтин челик, првенствено од Кина, за кој велат дека им штети на нивните домашни индустрии.

Американскиот претседател Доналд Трамп оваа година ги зголеми царините за поголемиот дел од увозот на челик и алуминиум од 25 на 50 проценти, додека Канада ги заостри ограничувањата за увоз и воведе дополнителна царина од 25 проценти за целиот увоз на челик со потекло од Кина. Кина, од друга страна, ги отфрла обвинувањата дека го преплавува глобалниот пазар со вишок евтин челик.

ЕУ во вторник забележа дека „прекумерниот капацитет на челик е глобален проблем што бара силна, искрена и заедничка акција од сите партнери“.

Најавата за новите царини не е добро прифатена ниту во остатокот од Европа. Европската асоцијација на производители на автомобили (ACEA) предупреди дека мерките би можеле сериозно да ја загрозат домашната автомобилска индустрија.

Здружението истакнува дека европските производители на автомобили набавуваат околу 90 проценти од својот челик во рамките на ЕУ и се „најзагрижени“ за инфлациското влијание што ограничувањата ќе го имаат врз цените на европскиот пазар.

„Драматичното намалување на квотите и удвојувањето на царината надвор од квотата на 50% значително ќе ја намалат можноста за ублажување на притисокот врз европскиот пазар преку увоз“, се вели во соопштението на ACEA.

Тие додадоа дека новото правило за потекло, засновано на принципот „топење и леење“, дополнително ќе го ограничи увозот и „ќе создаде огромен административен товар за европските корисници на увезени челични производи“.

Генералната директорка на ACEA, Сигрид де Врис, рече дека здружението ја препознава потребата од заштита на челичниот сектор, но додаде: „Веруваме дека параметрите предложени од Комисијата одат предалеку во оградувањето на европскиот пазар. Треба да најдеме подобра рамнотежа помеѓу потребите на европските производители и корисниците на челик до овој степен“.