Бугарија ќе го тестира BG-ALERT и системот за рано предупредување

 Националниот систем за рано предупредување и алармирање (НСРПО) и мобилната апликација BG-ALERT денеска ќе бидат тестирани во повеќе градови во Бугарија, соопшти Министерството за внатрешни работи.

Тестовите ќе се одржат во периодот од 11:00 до 11:30 часот по локално време.

Преку звучните уреди на системот за рано предупредување ќе бидат емитувани сигналите „Национален аларм за тревога“ и „Национален сигнал за крај на тревогата“ во Софија, Бургас, Варна, Карџали, Монтана, Пазарџик, Плевен, Пловдив, Русе, Смолјан, Враца и Стара Загора.

Слични звуци ќе се емитуваат и во одредени општини во регионите Видин, Перник и Јамбол, како и во 30-километарската зона околу нуклеарната централа „Козлодуј“.

Истовремено, системот BG-ALERT ќе испрати тест-порака низ целата држава, со текст на бугарски и англиски јазик. Овие пораки можат да се управуваат преку поставките на мобилните уреди. За нивно добивање, корисниците треба да ја активираат опцијата за „тест сигнали“ на својот уред.