Боки 13 ја напушта наградната игра поради стрес –УЈП ги проверува парите

Откако Управата за Јавни Приходи синоќа влезе во просториите на локалот Cabaret Clique во Штип, каде што без дозвола од Министерството за фанинасии наградна игра организираат Бојан Јовановски алиас Боки 13 и Стефан Лазаров, Боки 13 одлучи преку социјалните мрежи да се повлече од оваа наградна игра, поради како што вели нанесен и преживеан стрес.

Според извори на повеќе медиуми инспекторите синоќа земале изјава од Бојан Јовановски, кој како инвалид од прв степен, го води овој настан. Тој им рекол на инспекторите дека не е поврзан со настанот туку е само гостин.

-Јас сум само гостин ова е настан на Лазаров, тој треба да одговори на вашите прашања – им кажал Јовановски на инспекторите од УЈП.

Јовановски е на слобода откако „тој е инвалид од прв степен, а му се препорачува да биде физички активен“. Ова е медицински став од конзилијарното мислење на докторите презентирани во Кривичниот суд, поради кои осудениот од „Рекет“ останува на слобода.

Одлуката е донесена врз основа на докази односно медицинската документација, на која има повеќе од десетина потписи на доктори-специјалисти, професори од Универзитетската клиника св. „Наум Охридски“. 

Боки 13 доби прекин на казна врз база на медицинска документација која ја достави до јавноста. Во неа, освен препораки и насоки од доктори за таков чекор, имаше белешки од Итна медицинска помош во кои се констатира дека неговата болест не може да се третира во затворот „Идризово“ бидејќи ја нема соодветната терапија, нема постојано доктор, ниту пак услови за хигиено-диететски режим каков што му е потребен.

Боки 13 беше на пет операции. Шоуменот уште во 2019 направи операција за стеснување на желудникот и симна килограми, но во затворски услови состојбата постојано му се влошуваше.

Беше уапсен во акцијата „Рекет“, а потоа осуден бидејќи наводно уценувал одредени моќни и влијателни луѓе во Македонија и од нив барал огромни суми пари. Во 2020 година е осуден на девет години затвор во Скопје.

Јовановски, лани, во декември, беше пуштен од затворот „Идризово“ во Скопје по четири години затвор.