Боцвана сака да ја преземе контролата врз најголемата компанија за дијаманти во светот

Боцвана презема конкретни чекори за да обезбеди мнозински удел во мултинационалниот конзорциум за трговија со дијаманти „Де Бирс“, изјави претседателот Дума Боко, наведувајќи ги плановите да се натпреварува со соседна Ангола.

Конзорциумот за дијаманти „Де Бирс“ е во мнозинска сопственост на мултинационалниот рударски гигант „Англо Американ“, кој има 85 проценти удел, додека Боцвана држи 15 проценти.

Уделот на Боцвана во годишното производство на необработени дијаманти на „Де Бирс“ изнесува 70 проценти.

„Англо Американ“ сега го продава целиот свој удел во „Де Бирс“, велејќи дека има намера да го префрли својот фокус на бакар, метал неопходен за технологиите за чиста енергија.

Економијата на Боцвана во голема мера зависи од извозот на дијаманти, па затоа владата го смета „Де Бирс“ за стратешка предност, иако по падот на светскиот пазар на дијаманти, таа полека се свртува кон други економски гранки.

„Се стремиме да го прошириме рударскиот сектор на други минерали, но дијамантите ќе останат важен двигател на растот“, им рече претседателот Боко на пратениците во Габороне.

„Затоа преземаме конкретни чекори кон стекнување на акциите на „Англо Американ“ во Де Бирс“, рече Боко, без да образложи.

Министерот за рударство на Боцвана се сретна со својот анголски колега Дијамантино Азеведо на разговори во Габороне во петокот, откако двете партнерски земји сигнализираа намера да дадат понуди за мнозински удел во „Де Бирс“.

По состанокот, официјален претставник на Боцвана не сакаше да коментира за конкурентските понуди. Анголското министерство соопшти дека министрите разговарале за стекнување удел во „Де Бирс“.

„Англо Американ“ проценува дека „Де Бирс“ вреди 4,9 милијарди долари.

Порано оваа година, владата на Боцвана потпиша нов договор за продажба на дијаманти со „Де Бирс“, обезбедувајќи поголем дел од приходите.

Боцвана и „Де Бирс“ се рамноправни ко-сопственици на проектот Дебсвана, каде што заеднички копаат дијаманти. Конзорциумот купи 75 проценти од производството, а само 25 проценти ги купи државната компанија од Боцвана, која беше основана за Боцвана да може да продава дијаманти надвор од мрежата на „Де Бирс“.

Според условите на договорот, уделот на Боцвана во купувањето необработени скапоцени камења ќе се зголеми во следните десет години од сегашните 25 на 50 проценти.

Активноста во економијата на Боцвана ќе се намали за три проценти во 2024 година, според податоците од Меѓународниот монетарен фонд (ММФ), по падот на глобалниот пазар на дијаманти. Во 2023 година, активноста се зголеми за 3,2 проценти.

Цените на необработените дијаманти паднаа минатата година поради слабата побарувачка и огромната понуда. Во последно време, купувачите се повеќе се склони кон дијаманти произведени во лабораторија, а помладите всушност не ги купуваат.

Според октомвриските проценки на ММФ, БДП на Боцвана исто така треба да се намали оваа година, но за значително поблаги 0,9 проценти, првенствено поради понатамошниот пад на производството на дијаманти.