Баро: Војната со Иран е речиси неизбежна доколку преговорите не успеат

Доколку преговорите за иранската нуклеарна програма пропаднат, „воен конфликт“ би бил „речиси неизбежен“, изјави синоќа францускиот министер за надворешни работи Жан-Ноел Баро во говор во Парламентот.

Баро додаде дека можностите се намалуваат, бидејќи остануваат само уште неколку месеци до истекот на актуелниот договор.

-Десет години по иранскиот нуклеарен договор, нашата доверба и нашето убедување остануваат недопрени. Иран никогаш не смее да се здобие со нуклеарно оружје, а приоритет е да се постигне договор што „проверливо и одржливо“ ја ограничува иранската нуклеарна програма, рече Баро

Американскиот претседател Доналд Трамп неодамна изјави дека ќе има „бомбардирање на Иран доколку нема договор“.

Францускиот претседател Емануел Макрон вчера го свика Советот за одбрана за да разговара за Иран, стратешките прашања и кризата на Блискиот Исток.

Иранската нуклеарна програма е во центарот на меѓународното внимание, како и поддршката на Иран за бунтовниците хути во Јемен, кои ја попречуваат пловидбата по Црвеното Море.

Западните земји, предводени од САД, со децении се сомневаат дека Иран сака да изгради нуклеарно оружје.

Врховниот лидер на Иран, ајатолахот Али Хамнеи неодамна вети „цврст одговор“ доколку дипломатијата пропадне и Иран биде бомбардиран.