Азиски пазари: Индексите претежно во пад

Азиските индекси се претежно во минус, бидејќи инвеститорите ја проценуваат глобалната трговска клима откако американскиот претседател Доналд Трамп ја одложи примената на царини од 50 проценти за увоз од Европската Унија.

Индексот MSCI на акциите од Азиско-пацифичкиот регион, без Јапонија, се намали за 0,17 проценти околу 6:00 часот наутро. Во исто време, јапонскиот Nikkei се лизна за 0,21 проценти, индискиот Nifty за 0,74 проценти, а кинеските берзи исто така беа малку во пад.

Волстрит беше затворен во понеделник поради државен празник, па обемот на тргување беше послаб од вообичаеното во остатокот од светот, а немаше и поголеми нови насоки, па инвеститорите главно ги разгледуваа последиците од укинувањето на царините на Трамп за европскиот извоз во САД.

„Ова беше подобар ден за ризичните средства, откако Трамп ги одложи царините на ЕУ до 9 јули. Мислам дека двигателот на берзите веројатно ќе биде прилагодувањето на инвестициските портфолија на крајот од месецот до крајот на неделата“, рече Тони Сикамор, пазарен аналитичар во IG.

Инвеститорите, исто така, ќе се фокусираат на говорите на голем број креатори на политики на ФЕД и на американскиот ценовен индекс во петок, за сигнали за понатамошни движења на каматните стапки во САД. Дводневната годишна конференција, организирана од Банката на Јапонија (BOJ) и нејзиниот придружен тинк-тенк, започна во вторник, а се очекува овогодинешниот собир на глобалните централни банки во Токио да се фокусира на забавувањето на економскиот раст и тврдоглавата инфлација.