Американците му се закануваат на Алжир со санкции поради купувањето на руски ловци Су-57

САД размислуваат за воведување санкции врз Алжир поради купувањето на руски борбени авиони Су-57, а Вашингтон размислува за спроведување на законот CAATSA за да ги блокира овие воени договори и да изрази загриженост поради зајакнувањето на алжирско-руските воени врски.
Соединетите Американски Држави би можеле да воведат санкции врз Алжир поради купувањето на руски борбени авиони Су-57, кои се наменети да ги заменат постојните, застарени авиони во флотата на земјата.

На сослушување пред Комитетот за надворешни односи на Сенатот, шефот на Бирото за блискоисточни прашања на Стејт департментот, Роберт Паладино, посочи дека извештаите за купување руско воено оружје од страна на Алжир предизвикуваат загриженост кај администрацијата во Вашингтон.

Според него, Вашингтон би можел да ги блокира ваквите договори со примена на Законот за справување со непријателите на Америка преку санкции, кој се користи за воведување рестриктивни мерки против земјите вклучени во значајни одбранбени трансакции со Русија.

„Тесно соработуваме со алжирската влада за прашања каде што наоѓаме заеднички интереси. Во исто време, имаме сериозни несогласувања за многу други теми, а овој договор за оружје е пример за она што САД го сметаат за проблематично“, рече Паладино.

Тој додаде дека Вашингтон во моментов ги користи постојните дипломатски инструменти „за да ги заштити нашите интереси и да го спречи она што го сметаме за неприфатливо“.

Кога станува збор за самата набавка, Алжир ја потврди набавката на најновите ловци од Русија во 2025 година, со што стана првиот странски купувач на овој тип авиони.

Внатрешните документи на Ростек, исто така, укажуваат на планови за испорака на напредни ловци во Алжир, што дополнително ги потврди намерите на двете страни.

Ловецот Су-57 е развиен од руското дизајнерско биро Сухој, а првпат полета во 2010 година, додека првата серија влезе во служба на руските вооружени сили во 2020 година.

Претходно, Индија, исто така, ја разгледа можноста за купување на овој авион, но Њу Делхи подоцна инсистираше на локализирање на производството на борбени авиони на сопствена територија.