Албанскиот премиер Рама потврди дека постапката за затворање на ТикТок е завршена

Албанскиот премиер Еди Рама во директна комуникација со граѓани на Фејсбук „Очи в очи“ изјави дека процедурите за затворање на ТикТок се веќе завршени.

Тој исто така ги предупреди оние кои ќе користат бесплатни VPN за пристап до социјалната мрежа ќе бидат под ризик на хакери, па затоа ги посоветува граѓаните да останат без ТикТок додека платформата не дојде во Албанија со план за тинејџери.

– Постапката за затворање на ТикТок е завршена за паметните телефони, а од друга страна, сакам сите да знаат дека начинот да се избегне блокирањето со користење на бесплатен VPN е многу опасен бидејќи во светот е познато дека хакерите се прославуваат со кражба на податоци од телефонот. Имајте го ова на ум и издржете без ТикТок уште некое време додека не ја завршиме заедничката програма со компанијата, која ќе го претстави планот за Албанија, рече Рама.

По трагичната случка во која тинејџер смртно рани свој врсник поради кавга на ТикТок, во декември Еди Рама, најави блокирање а во февруари беше донесена одлука Платформата ТикТок во земјата да се затвори од 15 март, но засега таа се уште функционира.

Опозицијата е против оваа одлука на Владата, која смета дека е цензура, а вчера новинарските здруженија, АГШ и БИРН доставија барање до Уставниот суд за поништување на владината одлука за затворање на оваа платформа со аргумент дека е спротивна на Уставот и Конвенцијата за човекови права.