Ако административецот две години по ред добие оценка „1“ останува без работа
Собранието ги донесе измените и дополнување на Законот за административни службеници и измени на Законот за административни службеници, двата по скратена постапка.
Предложените законски решенија имаат за цел да обезбедат појасна, единствена, ефикасна и правно сигурна примена на прописите, уредувајќи го статусот на службениците во Службата на Собранието и регулаторните тела на исто ниво со другите посебни државни службеници.
Со предложениот закон се укинува можноста за унапредување на административните службеници без објавување интерен оглас, со што се обезбедува еднаков пристап и примена на мерит системот. Со законот се воведува јасна правна последица со која на административниот службеник кој две години последователно ќе биде оценет со оценка „1 – не задоволува“ му престанува работниот однос по сила на закон. Се овозможува поекономично спроведување на постапките без неоправдано одолговлекување (со задржување на правото на жалба).
Опозициската СДСМ не гласаше за законите, а обвини дека пратениците од ВМРО-ДПМНЕ прво ја укинала независноста на собраниската служба, а сега ја враќаат. Исто така, тие имаа забелешки и за одредбите што се однесуваат на санкции за административните службеници.
Координаторот на пратеничката група на СДСМ Оливер Спасовски истакна дека во законот е ставена одредба за дисциплинирање на администрацијата, па и на Собраниската служба, како и дека до 2024 година Собраниската служба била независна, а исто така и дека осамостојувањето на Собранието треба да продолжи и со независноста на собраниското обезбедување.
Спасовски рече дека независноста на собраниската служба не е новина, како што се претставува од страна на власта, потсетувајќи дека вакво решение било воспоставено во периодот од 2020 до 2024 година.
„Луѓето во Собранието го имаа ова пред шест години како право и го има од 2020 година до 2024 година, додека ВМРО-ДПМНЕ не дојде на власт. И се сеќавате дека тоа го укинаа како право“, истакна Спасовски.
Тој потсети дека во 2019 и 2020 година и ВМРО-ДПМНЕ го поддржувала концептот на независна собраниска служба, оценувајќи дека денес е некоректно повторното воспоставување на одредени решенија да се претставува како историски исчекор, без да се признае дека дел од тие права веќе постоеле.
„Да, тоа што сме го направиле заеднички, сме го направиле заеднички. Собраниската служба треба да има независност и тука нема дилема, но собраниската служба не може преку други одредби таа независност да ја губи и на директен начин да се врши собраниски притисок, политички, којшто го има“, нагласи Спасовски.
Тој предупреди дека одредбите за преместување, оценување и дисциплинска одговорност на административните службеници можат да отворат простор за злоупотреби и политичко влијание врз вработените.
„Ставате одредби со коишто можете да ги дисциплинирате сите во службата, во администрацијата, па и во собраниската служба“, рече Спасовски, осврнувајќи се на можноста негативното оценување да доведе до губење на работното место.
Координаторот на пратеничката група на ВМРО-ДПМНЕ Никола Мицевски рече дека има закони што се добри и што не се добри и оти тоа што не се донело во 2019 година сега се исправа.
„Една работа да пофалевте, да речете добро е – се исправи една работа“, рече Мицевски, додавајќи дека додека СДСМ биле на власт во периодот од 2019 до 2024 година не биле исправени грешките.