Први реакции за „Клиф Бут“: Продолжението со Бред Пит е „апсолутен триумф“ и „исклучително забавно љубовно писмо“ до Холивуд


Лос Анџелес –  Долгоочекуваното продолжение на филмот „Беше еднаш во Холивуд“ (Once Upon a Time in Hollywood) – проект на Дејвид Финчер, Бред Пит и Квентин Тарантино, официјално насловен „Понатамошните незгоди на Клиф Бут“ (The Further Mis-Adventures of Cliff Booth) – им беше прикажано на филмските новинари. Тие го опишуваат ова големо остварување, поддржано од „Нетфликс“, како „исклучително забавен“ филм во кој едноставно уживате во друштвото на ликовите, истакнувајќи дека тој веќе е еден од најдобрите филмови оваа година.

„Филмот ’Понатамошните незгоди на #КлифБут‘ на Дејвид Финчер е полн со енергија, пулсира и пршти“, напиша филмскиот критичар Сајмон Томпсон. „Како и ’Беше еднаш во Холивуд…‘, ова е љубовно писмо до Лос Анџелес. Еклектичната и шаренолика актерска екипа го претвора филмот во елегантна и заводлива авантура. Станува збор за дрско и постепено загревање – еден вид придружно дело кон оригиналот на Тарантино, кое кулминира со експлозивен завршен чин.“

Бред Пит со Инес де Рамон на премиерата во Лос Анџелес

Критичарот Зак Поуп го нарече филмот „чиста филмска комбинација од три елементи: карактеристичниот хаос на Тарантино, педантната посветеност на деталите на Финчер и ликот Клиф Бут, кој Бред Пит го толкува со неверојатна, природна харизма“.

Тој додава: „Сè е спакувано во стилско љубовно писмо до холивудската кинематографија од 1970-тите, кое нè потсетува дека понекогаш е доволна само една опуштена, исклучително забавна авантура со лик со кој едноставно обожавате да поминувате време. Авантура која можеби ќе прерасне во целосно лудило. Филмот е кул, хаотичен, шармантен и никогаш не се обидува да биде нешто повеќе отколку што треба. Ако ви се допадна ’Беше еднаш во Холивуд‘, тогаш овој филм е дефинитивно за вас. Исто како што беше и за мене.“

Дру Тејлор, виш филмски репортер за „The Wrap“, вели дека филмот „апсолутно му се допаднал“. „Тарантино и Финчер се како путер од кикирики и чоколадо (при што путерот од кикирики е полн со пцовки, а чоколадото е натопено во крв). Оставете сè што правите, отидете да го гледате на најголемото можно платно и поминете си незаборавно. Апсолутен триумф. Најдоброто нешто“, напиша тој.

„’Понатамошните незгоди на Клиф Бут‘ е вистински погодок“, напиша Рики Валеро, член на здружението „Critics Choice“. „Естетски богат филм кој на прекрасен начин го доловува односот помеѓу Лос Анџелес и филмовите. Бред Пит е харизматичен како и секогаш. Навистина еден од најдобрите филмови оваа година.“

Клејтон Дејвис од „Варајети“ (Variety) го опиша филмот како „луд, урнебесен филм за дружење“. „Бред Пит повторно влегува во својата омилена, наградена со Оскар улога и ја дава својата најдобра изведба уште од ’Беше еднаш во… Холивуд‘. Елизабет Дебики внесува опивачка сензуалност, а Скот Кан и Питер Велер се толку одлични што заслужуваа и трипати повеќе простор на екранот“, додаде тој. „Кинематографијата е прекрасна. Ако филмот од 2019 година беше љубовно писмо до Лос Анџелес, тогаш овој е вистински сонет.“

„Понатамошните незгоди на Клиф Бут“ („The Further Mis-Adventures of Cliff Booth“) го означуваат враќањето на Пит во улогата на истоимениот каскадер. Дејството на филмот се одвива во 1977 година, осум години по настаните во „Беше еднаш во Холивуд“ („Once Upon a Time in Hollywood“), и го следи Клиф во улогата на човек за „решавање проблеми“ во холивудско студио, кој се наоѓа во ситуација што целосно го надминува, додека работи за еден популарен филмски актер. Во актерската екипа, меѓу другите, се појавуваат Бред Пит, Елизабет Дебики, Скот Кан, Јахја Абдул-Матин II, Карла Гуџино и Питер Велер.

Пит освои Оскар за најдобра машка споредна улога за ликот на Клиф Бут во „Беше еднаш во Холивуд“, филм што „Сони“ го пушти во кината во јуни 2019 година. Филмот доби одлични критики и оствари импресивна заработка од 410 милиони долари на светските кино-благајни. „Холивуд“ доби 10 номинации за Оскар, вклучително и за најдобар филм и најдобра режија.

Сценариото за „Понатамошните незгоди на Клиф Бут“ е дело на Тарантино, кој одлучи да не го режира филмот бидејќи, според неговиот план за пензионирање, планира да режира уште само еден долгометражен филм пред трајно да се повлече од режисерската столица. Како што откри Финчер за списанието „Емпајр“ („Empire“) минатиот месец, првата верзија на сценариото за продолжението броела дури 230 страници. Режисерот отстранил 60 страници.

„Понатамошните незгоди на Клиф Бут“ пристигнува ексклузивно во „Ајмакс“ („Imax“) кината на 25 ноември, а од 23 декември ќе биде достапен за гледање на „Нетфликс“ („Netflix“).