Роберт Патинсон е новиот Џејмс Бонд
Лондон – Британскиот актер Роберт Патинсон ќе ја преземе улогата на Џејмс Бонд во следниот филм за британскиот шпион ставајќи крај на долгогодишните шпекулации за иднината на 007.
Тој ќе го замени Даниел Крег, кој ја презеде улогата во филмот „Казино Ројал“ (Casino Royale) во 2006 година, а се повлече по својот петти филм „Нема време за умирање“ (No Time To Die), во 2021 година.
Следниот филм за Бонд е моментално во фаза на развој. Минатата година беше објавено дека сценариото ќе го напише Стивен Најт, креаторот на серијата „Пики Блајндерс“ (Peaky Blinders).
Режисерот на „Дина“ (Dune) Дени Вилнев ќе го режира филмот – кој сè уште нема наслов, но моментално се нарекува „Бонд 26“ (Bond 26) – а продуценти ќе бидат Ејми Паскал и Дејвид Хејман.
Во својата изјава, Патинсон рече: „Џејмс Бонд е еден од најлегендарните ликови во филмската уметност, а да ми се довери улогата на 007 е чест што се доживува само еднаш во животот“.
Тој изјави дека е „длабоко благодарен“ на тимот што стои зад филмот „за нивната доверба во мене“. Додаде: „Да се каже дека оваа улога е остварување на сонот, би било премалку. Не можам да бидам повозбуден за оваа соработка и за работата што претстои со овој фантастичен тим“.
Вилнев изјави: „Пред сè, сакам да изразам длабока благодарност до извонредните актери кои ни се придружија на ова патување.Бевме опкружени со исклучителни таленти, но може да постои само еден 007. Пресреќен сум што можам да му посакам добредојде на Роберт Патинсон како наш нов Џејмс Бонд. Тој ја поседува безвременската душа на 007 и внесува дух што е сосема нов. Едвај чекам да започнеме“.
Мајк Хопкинс, шефот на „Prime Video“ и „Amazon MGM Studios“, го нарече Патинсон „исклучителен избор“, фалејќи го неговиот „неверојатен опсег, магнетно присуство на екранот и тивка интензивност“.
Краток најавен видео-клип, објавен на социјалните мрежи, го прикажува Патинсон со пиштол во рака и во смокинг, проследен со текстот: „Џејмс Бонд ќе се врати“. Во описот стоеше: „Идентитетот е потврден“. Во друга објава пишуваше: „Роберт Патинсон е Џејмс Бонд“.

„The Hollywood Reporter“ објави дека процесот на избор на актери „бил толку таен, што Патинсон дознал дека ја добил улогата дури во неделата наутро, и тоа лично од Вилнев“. Според публикацијата, одлуката да се ангажира оваа ѕвезда „е спротивна на вообичаеното мислење дека улогата на Бонд ќе му припадне на актер со помал профил“.
Патинсон се прослави во франшизите „Хари Потер“ и „Самрак“ (Twilight) во текот на 2000-тите години, по што се повлече од блокбастерите за да се посвети на независни филмови. Тој се врати на високобуџетните филмови со шпионскиот трилер „Тенет“ (Tenet) на Кристофер Нолан од 2020 година, а потоа ја толкуваше улогата на Брус Вејн во филмот „Бетмен“ (The Batman) од 2022 година.
Актерот имаше многу активна 2026 година, добивајќи пофалби од критиката за неговите улоги во филмовите „Одисеја“ (The Odyssey), „Драмата“ (The Drama) и „Прајмтајм“ (Primetime). Неговиот следен филм е научно-фантастичниот еп на Вилнев, „Дина: Трет дел“ (Dune: Part Three), кој пристигнува во кината на 18 декември, а моментално го снима „Бетмен: Втор дел“ (The Batman: Part II), чија премиера е закажана за февруари 2028 година.
Во интервју за британското списание „Shortlist“ од 2012 година, Патинсон изјави дека „дефинитивно“ би сакал да го игра Бонд за „20 години“. Тој рече: „Мислам дека нема ништо полошо од тоа да се каже: ’Ајде да најдеме некој нов, свеж Бонд!‘. Тоа би била најлошата идеја на светот. По Даниел Крег, ликот мора да има некаква ’историја‘ зад себе. Би било смешно тој повторно да се претстави како некое младо, разгалено момче од високата класа. Или, ако е таков, тогаш во првите неколку сцени би морал да претрпи страшни мачења. Би морал да го снимам првиот филм со една рака или нешто слично“.
Процесот на избор на актер беше првиот што се одвиваше без учество на семејството Броколи, кое ја надгледуваше филмската франшиза за Бонд уште од нејзиниот почеток во 1962 година. Во февруари 2025 година, семејството објави дека ја препушта креативната контрола на „Amazon MGM Studios“.
На настанот „CinemaCon“ во април, Кортни Валенти, раководителот за филм во „Amazon MGM“, го пофали креативниот тим, наведувајќи дека тие „го подготвуваат теренот за нешто што е навистина достојно за наследството на Бонд“.
Според официјалната веб-страница на 007, пробните снимања за улогата „се сложени потфати кои вклучуваат фризура и шминка, костими, сценографија и други актери“.
Крег го играше Бонд во пет филмови, почнувајќи со „Казино Ројал“ (Casino Royale) од 2006 година. Филмот „Нема време за умирање“ (No Time to Die) од 2021 година заврши со смртта на неговата верзија на 007.

Неговото заминување поттикна бурни шпекулации за тоа кој ќе го наследи. Меѓу актерите кои се поврзуваа со улогата пред официјалното соопштение беа Џек Лауден, Калум Тарнер, Николас Холт, Џош О’Конор, Џек Бартон, Арон Тејлор-Џонсон и Луис Партриџ. Кога во ноември 2024 година „Варајети“ (Variety) го праша кого би сакал да го види во улогата на Бонд, Крег одговори: „Не ми е важно“.
Другите актери кои го толкувале ликот на Бонд се Шон Конери, Џорџ Лазенби, Роџер Мур, Тимоти Далтон и Пирс Броснан.