30.000 шишиња вино од врвен квалитет украдени од винарија во Тоскана

Фиренца – 30.000 шишиња вино од врвен квалитет во вредност од околу пет милиони евра се украдени од најголемата семејна винарија во Италија, „Марчези Антинори“, соопшти компанијата.

„Антинори“, која датира од 1385 година и сега извезува во 170 земји, ги предупреди клиентите да бидат претпазливи со понудите надвор од официјалните продажни канали по грабежот што се случи за време на викендот. Производителот сè уште се надева дека ќе го врати украденото вино, објави „Ројтерс“.

Што исчезна од магацинот
Компанијата соопшти дека крадците зеле помеѓу осум и десет илјади шишиња „Солаја“, една од најбараните етикети во Италија, како и вина „Тињанело“ и „Гвадо ал Тасо“.

Овие вина се продаваат на мало за 150 евра и повеќе, но некои од најретките вина можат да достигнат цена од неколку илјади евра за шише.

Ова е најновиот во серијата грабежи во италијански винарии, по познатата винарија Банфи во Монталчино во јули.

Претходно, ваквите кражби вклучуваа помали количини, како што се неколку шишиња украдени од ресторан, подрум или една од локациите за дистрибуција, но поновите случаи вклучуваа грабежи од големи размери од залихи лоцирани во самите винарии.

Професионална операција од маскирани крадци
Антинори, со седиште во Фиренца, има снимки од надзор на кои се гледаат седум маскирани мажи како влегуваат во магацин во Кортона минатиот викенд и ги исклучуваат алармните системи. Потоа натовариле илјадници гајби тоскански црвени вина во два камиона, објавува Ројтерс.

Антинори рече дека времето и професионализмот на кражбата, откриени во понеделник наутро кога персоналот пристигнал во магацинот, сугерираат дека била вклучена високо организирана група.

Грабежот бил дополнително олеснет од фактот дека вината во тој момент се подготвувале за испорака.