Француска астронаутка се врати на Земјата по 237 дена во вселената

Астронаутката Софи Аденот се врати на Земјата по осуммесечна мисија во која беше поставен нов рекорд за најдолг престој во вселената од европски астронаут. Таа вчера ја напушти Меѓународната вселенска станица и слета во океанот со уште тројца членови на екипажот околу 17:30 часот денес, објави Еуроњус.

По еднодневно патување, капсулата што ја носеше француската астронаутка слета во Тихиот Океан, покрај брегот на Сан Диего во 17:35 часот денес по француско време. Аденот помина 235 дена на надморска височина од 400 километри. Рускиот космонаут Андреј Федјаев и американските астронаути Џесика Меир и Џек Хатавеј исто така се вратија со неа.

Последните минути од летот беа многу напорни. Екипажот влезе во атмосферата со голема брзина, а потоа вселенското летало беше забавено од моќни падобрани. За време на оваа фаза од спуштањето, комуникациите со Земјата беа прекинати.

По излегувањето од капсулата и краткиот медицински преглед, четворицата астронаути ќе бидат префрлени на копно. Прво ќе пристигнат на американската поморска станица Норт Ајленд во Сан Диего, од каде што ќе го продолжат своето патување до вселенскиот центар Џонсон на НАСА во Хјустон.

Медицински тим од Европската вселенска агенција (ЕСА) ќе се грижи за Софи Аденот за време на летот до Келн. Во Германија, астронаутката ќе се сретне со своето семејство и ќе започне повеќедневна програма за закрепнување.

Во февруари, Софи Аденот стана втората Французинка што ја премина линијата Карман, меѓународно признатата граница на вселената. Првата беше Клоди Ањењере пред триесет години. Аденот е исто така првата Французинка што прошета во отворен вселенски простор. Таа имаше три вселенски прошетки: на 18 и 25 август и на 1 септември.

Со вкупно 237 дена во вселената, единаесеттиот француски астронаут стана рекордер за најдолг европски вселенски лет. Рекордот претходно го држеше италијанскиот астронаут Лука Пармитано, кој помина 201 ден во орбитата во 2019 и 2020 година.