Цени на гас над 70 евра: ЕУ е поканета да ја намали потрошувачката

Европскиот комесар за енергетика, Дан Јоргенсен, предупреди дека земјите-членки на Европската Унија треба да размислат за намалување на потрошувачката на гас поради ненадејниот пораст на цените.

Складирањата за гас во Европа во моментов се полни со околу 70 проценти, додека цената на гасот на холандскиот референтен пазар TTF е над 70 евра за мегават-час со недели, што е ниво кое не е забележано од енергетската криза во 2022 година, објавува Euraktiv.

„Се соочуваме со ценовна криза која е поврзана со криза во снабдувањето“, предупреди Јоргенсен во писмо до министрите за енергетика на земјите-членки, до кое Euraktiv имаше пристап.

Во писмо од 25 септември, кое првично го објави Ројтерс, Јоргенсен наведува дека, покрај напнатата ситуација на глобалниот пазар на течен природен гас (LNG), екстремно топлото и суво лето стави дополнителен товар врз енергетските системи на неколку членки на ЕУ.

Министрите за енергија на ЕУ ќе се состанат на 29 септември во Ирска на неформални разговори.

Тој ги повика земјите-членки да разгледаат мерки што би поттикнале дополнително полнење на складиштата или би ја намалиле потрошувачката на гас и електрична енергија.

Според неговиот предлог, државите би можеле да ги охрабрат домаќинствата да ја намалат потрошувачката на електрична енергија во периоди на врвна побарувачка, да го ограничат греењето во јавните згради и да го исклучат непотребното јавно осветлување ноќе, со цел да се намали потрошувачката на гас за производство на електрична енергија.

Јоргенсен, сепак, предупреди дека во моментов „нема непосредни ризици за безбедноста на снабдувањето“.

Тој упати сличен апел до земјите-членки во март, кога ги повика да ги зголемат залихите на гас во магацините, но тој повик немаше очекуван ефект.