САД ја кочат продажбата на имотот на „Лукоил“ вреден 20 милијарди долари

Продажбата на меѓународниот имот на „Лукоил“ – проценет на 20 милијарди долари – на американскиот инвестициски фонд „Карлајл“ е блокирана од американските власти веќе речиси 10 месеци. (Фото: BGNES)

Продажбата на меѓународниот имот на „Лукоил“ – проценет на 20 милијарди долари – на американскиот инвестициски фонд „Карлајл“ е закочена од американските власти речиси 10 месеци по почетокот на преговорите, пренесува „Фајненшeл тајмс“.

Одложувањето ги попречува напорите за зголемување на производството на бензин и дизел во европските рафинерии, во време кога недостигот на гориво ги искачи цените во САД и Европа на рекордно ниво.

Целта на договорот е да се одвои руската нафтена компанија од нејзиниот имот во 17 земји. Иако продажбата доби одобрение од Канцеларијата за контрола на странски средства (ОФАЦ) при Министерството за финансии на САД, конечното одобрение сè уште не е издадено.

Процесот е блокиран на меѓуагенциско ниво во рамките на администрацијата на претседателот Доналд Трамп, додека се чека координација меѓу Советот за национална безбедност, Стејт департментот и Министерството за енергетика. „Веќе не разбираме што се случува со договорот. Нема апсолутно никаков напредок. Сè е едноставно замрзнато и не знам што друго чекаат“, изјави за весникот еден од учесниците во процесот.

Европските операции на „Лукоил“ вклучуваат рафинерии во Бугарија и Романија, како и 45-процентен удел во рафинеријата „Зеланд“ во Холандија. Вкупниот капацитет на трите постројки изнесува приближно 400.000 барели дневно.

Сепак, рафинеријата „Петротел“ во Романија не работи откако беше затворена поради планирано одржување минатата година. Според извор вклучен во преговорите, склучувањето на договорот би овозможило активирање на дополнителен преработувачки капацитет од 100.000 до 150.000 барели дневно.

„Европските постројки на ‘Лукоил’ располагаат со значителен неискористен преработувачки капацитет што би можел да ги зголеми залихите на нафтени деривати и да го ублажи притисокот врз цените на горивата“, изјавија од „Карлајл“ за „Фајненшел тајмс“. Публикацијата го поврзува акутниот недостиг на дизел гориво на западните пазари со конфликтот на Блискиот Исток и украинските напади врз руските рафинерии.

Во меѓувреме, на 21 септември, цените на нафтата паднаа на најниското ниво во последните 11 дена, објави Ројтерс. Инвеститорите се надеваат дека состаноците за време на Генералното собрание на ОН оваа недела ќе придонесат за дипломатско решение на конфликтот во кој е вклучен Иран. Пазарите исто така го следат делумното обновување на испораките од Саудиска Арабија.

„Испораките на нафта од Блискиот Исток остануваат изненадувачки стабилни и покрај прекините на саудискиот нафтовод „Исток-Запад““, истакнаа аналитичарите од ЏП Морган Чејс.

Во последните денови, низ Ормускиот теснец поминувале просечно 2,9 милиони барели саудиска нафта дневно, во споредба со 700.000 барели во август.

САД воведоа санкции против „Лукоил“ во октомври 2025 година за да го зголемат притисокот врз Москва поради нејзината инвазија на Украина. Вашингтон го блокираше обидот на трговецот со нафта „Гунвор“ (Gunvor) да ги преземе странските средства на руската компанија.

Министерството за финансии на САД неколку пати ја продолжуваше дозволата што овозможува продолжување на преговорите за продажбата. На 18 септември, рокот беше продолжен до 22 октомври.

„Овие средства се оставени во правен и оперативен вакуум“, изјави за „Фајненшел тајмс“ извор запознаен со договорот. „Тие чекаат американската влада да одлучи кој ќе биде нивниот следен сопственик. Во меѓувреме, тие не работат со полн капацитет и пропаѓаат бидејќи во нив не се инвестираат средства“, додаде изворот.

Договорот повторно привлече внимание откако американскиот Конгрес го одобри предлог-законот поднесен од сенаторот Линдзи Греам, чија цел е зголемување на притисокот врз Москва. Законот предвидува мерки против рускиот енергетски и одбранбен сектор, како и царини до 100% за стоки од земји што купуваат руска нафта и гас или овозможуваат заобиколување на санкциите.

На 19 септември, претседателот Доналд Трамп го потпиша новиот пакет санкции, претворајќи го во закон.