Измислува ли владата на Мицотакис можен напад од Турција?

Главната грчка опозициска партија, социјалистичката ПАСОК, остро ја критикуваше владата откако еден министер изјави дека Турција би можела да изврши напад доколку на изборите во 2027 година не се формира стабилна влада.

Тензиите во Атина се веќе високи пред изборите закажани за напролет 2027 година, а анкетите покажуваат дека владејачката партија Нова демократија на премиерот Киријакос Мицотакис се соочува со тешкотии да го обезбеди апсолутното мнозинство потребно за самостојно владеење.

Мицотакис постојано истакнува дека на Грција ѝ е потребна стабилна влада, особено поради тоа што во јули 2027 година таа ќе го преземе ротирачкото претседателство со Советот на ЕУ.

Сепак, неговиот министер за правда, Јоргос Флоридис, отиде чекор понатаму, изјавувајќи дека следните избори ќе наметнат „сурова дилема“.

„Немајте дилеми: доколку земјата остане без влада, инвазија од другата страна на границата е неизбежна“, рече Флоридис, мислејќи на соседна Турција.

„Од паролата ’Мицотакис или хаос‘, преминавте на ’Мицотакис или Ердоган‘“, изјави лидерот на ПАСОК, Никос Андрулакис, осврнувајќи се на турскиот претседател и обвинувајќи го премиерот дека ги третира изборите како „игра“ што ги поткопува националните интереси.

Мицотакис го повика својот политички ривал да не ги вовлекува прашањата од надворешната политика во домашната политичка дебата.

„Тоа покажува длабока неодговорност. Морам да побарам од вас да го повлечете тоа“, рече Мицотакис, но без притоа јавно да ги критикува изјавите на сопствениот министер.

И Грција и Турција се членки на НАТО, но имаат долготрајни спорови околу поморските граници кои често доведуваат до остра реторика, особено кога двете земји се соочуваат со внатрешни проблеми.

Ова не е првпат грчко-турските односи да ескалираат за време на предизборни периоди.

„Кога се приближуваат изборите, тензиите обично растат, а потоа повторно опаѓаат. Тоа сме го виделе и претходно“, изјави претходно овој месец за „Еурактив“поранешниот турски министер за прашања поврзани со ЕУ, Егемен Багиш.

Сепак, ситуацијата не е поинаква ниту од другата страна. Изборите во Турција се закажани за 2028 година, а уставот на земјата не дозволува трет претседателски мандат за актуелниот претседател Реџеп Таип Ердоган.

Тоа би можело да се случи само доколку се распишат предвремени избори. „Претстојат избори и ни посакувам голем успех“, изјави оваа недела Ердоган, во порака што нашироко се толкува како повик за предвремени избори.

Локалните провладини медиуми значително го засилија известувањето за она што го нарекуваат стратешко „опколување“ на Турција, предизвикано од напредната воена соработка меѓу Грција и Израел.

Осврнувајќи се на Израел, турскиот министер за надворешни работи Хакан Фидан дури и ја советуваше Грција да не стане орудие во рацете на „оние што сакаат да го дестабилизираат регионот и да го втурнат во хаос“. (Еурактив)