Маричиќ: Ќе ги убедуваме граѓаните дека мора да излезат на референдумот

По завршување на летните одмори, кампањата ќе биде интензивирана и ќе се користат сите достапни методи, во согласност со Законот за референдум и дефинираниот јавен интерес, најави Бојан Маричиќ, посебен советник за евро-атлантски интеграции во Владата на Република Македонија.
„Целта на кампањата ќе биде да ги информира граѓаните за Договорот, меѓутоа и за придобивките од членството во Европската унија и НАТО, како што укажува и прашањето на референдумот“, изјави Маричиќ во интервју за телевизија Канал 5.
Нагласи дека кампањата ќе биде промотивна и информативна, со главна цел јавноста да биде точно информирана и граѓаните да ги знаат вистинитите информации и за договорот и за придобивките од ЕУ и НАТО.
„Убедувањето на граѓаните ќе биде пред се дека мора да излезат и да гласаат затоа што е ова граѓански глас. Референдумот е врвен граѓански глас и врвно демократско право и сите оние, кои што, се заинтересирани за решавање на македонско-грчкиот спор и за иднината на Македонија во ЕУ и НАТО треба да излезат и да гласаат“, изјави Маричиќ.