Документите од хартија се менуваат со електронски

Документите од хартија наскоро ќе можат да бидат заменети со електронски кои ќе се добиваат само со неколку кликови. Секој граѓанин ќе може електронски да добива законски валидни документи од својот дом или секаде каде што се наоѓа, кои ќе бидат доставувани по електронска пошта и ќе бидат со еднаква вредност и важност како оние добиени на шалтер и во хартија. За оние граѓани што нема да можат да побараат услуги по електронски начин ќе постои и старата опција да ги добијат преку канцелариите за една точка на услуги и на другите шалтери на институциите кои нудат услуги, најави денеска министерот за информатичко општество и администрација Дамјан Манчевски.

Тоа, како што истакна на денешната прес-конференција, го овозможува усвојувањето на трите нови закони од страна на Владата – законот за централен регистар на население, законот за електронско управување и електронски услуги и законот за електронски документи, електронска идентификација и доверливи услуги.

-Основата на овој процес е новиот закон за централен регистар на население со кој се предвидува воспоставување на електронски регистар на население како единствена и во реално време ажурирана база на податоци за граѓаните, рече Маневски и додаде дека податоците во овој регистар ќе се добијат со спојување на податоците од МВР, Управата за водење на матични книги и Централниот регистар.
Во моментов, нагласи, се инсталираат хардверот и софтверот потребни за непречено функционирање на регистарот.

Со законот за електронско управување и електронски услуги се обезбедува ефикасно давање на услуги по електронски пат на основа на утврдени стандарди и процедури. Со него се воведува каталогот на услуги и новиот национален портал за електронски услуги. Каталогот ќе ги содржи сите потребни информации за сите услуги што ги нуди јавниот сектор, а преку порталот граѓаните ќе можат да добиваат зголемен број на услуги по електронски пат, рече Манчевски и додаде дека порталот ќе се надградува со зголемувањето на бројот на дигитализирани услуги.

Порталот, појасни, првпат обезбедува документи по електронски пат кои се подеднакво валидни како и хартиените документи. Инструкции за добивање услуги по електронски пат, граѓаните ќе можат да добијат во Салата за јавни услуги во Скопје и во останатите канцеларии во земјава наречени „Една точка за услуги“. Регистарот и порталот, потенцира, ќе станат функционални во рок од три месеци по донесувањето на законите во Собранието.

-Дефинирање и целосно обезбедување на дигитализацијата на услугите овозможува законот за електронски документи, електронска идентификација и доверливи услуги. Со него обезбедуваме гаранција електронските документи да имаат иста правна сила како и документите на хартија. За таа намена Владата преку МИОА обезбеди електронски печати за сите институции, а граѓаните својата електронска идентификација ќе можат да ја активираат со само едно евидентирање на системот. Тоа ќе може да го направат физички на некој од овластените шалтери на територијата на целата држава или електронски со набавување на токен, појасни Манчевски.

Нагласи дека законите гарантираат целосна доверливост и заштита на личните податоци и додаде дека генерална заложба е електронските услуги да бидат поевтини, но сепак посочи дека секоја институција треба сама да ги коригира своите ценовници за услуги.