Премиерно во МОБ: Балетот „Ана Каренина“ на музика на Чајковски

Македонската опера и балет во вторник (25 декември) премиерно ќе го изведе балетот во два чина „Ана Каренина“ според романот на Лав Толстој, на музика на Петар Илич Чајковски. Кореограф е Лео Мујиќ од Хрватска, а диригент Бисера Чадловска.

Кореографот Мујиќ, кој првпат работи во Македонија, за изборот познатото класично дело од крајот на 19 и почетокот на 20 век да биде основа на претставата, на денешната прес-конференција во МОБ рече дека покрај нови балетот мора да опслужува и класични литературни и музички дела.

– „Ана Каренина“ припаѓа во опусот на општата култура. Експлоатирана е и во други медиуми – во театар и филм, но може да најде место и во балетот. Она што сè уште ја привлекува публиката е приказната, односот меѓу ликовите и драмското дејство. А сето тоа на прекрасна симфониска музика и делници тешки за свирење кои не се изведуваат во балет. Спојот ќе донесе прекрасна претстава – рече Мујиќ.

Чајковски во својот опус често бил инспириран од делата на руската и светска класика, а никогаш не искористил дело од Толстој. Но, за романтична приказна во „Ана Каренина“, која обработува вечни теми како љубов, прељуба, љубомора, одмазда, трагедија, според МОБ музиката на Чајковски била најсоодветен избор.

Диригентката Бисера Чадловска рече дека во претставата се искористени најубавите и познати делови од симфониите на Чајковски кои, рече, отсекогаш сакала да ги работи и дека со овој балет се исполнува нејзината дамнешна желба. Меѓу делата на Чајковски е и светски популарниот Концерт за виолина кој е многу тежок за изведба и, како што рече, се нафатил да го отсвири нивниот концерт-мајстор Климент Тодоровски.

Ликот на Ана Каренина ќе го игра Мими Поп Алексова-Атанасовска, во алтернација со Марија Кичевска-Шокаровска. Во ликот на Вронски ќе настапи Бобан Ковачевски, Каренин ќе биде Васил Чичијашвили… Сценографијата е на Михајло Стојановски и Сашо Стојановски, костимограф е Александар Ношпал. По премиерата во вторник, балетот „Ана Каренина“ репризно ќе биде изведен на 29 февруари, а потоа на репертоар од февруари.