Македонија доби поддршката на патот кон НАТО на Минхенската безбедносна конференција
Вицепремиерката и министерка за одбрана Радмила Шекеринска, на вториот ден од Минхенската безбедносна конференција оствари повеќе средби и разговори со истакнати личности од одбраната и од политиката на кои беше потврдена поддршката на патот на земјава кон НАТО.
На ручекот организиран од германската министерка за одбрана Урсула фон дер Лајен, Шекеринска заедно со колегите од регионот, министрите за одбрана на Словенија Андреја Катич, на Хрватска Дамир Крстичевиќ и на Црна Гора Предраг Бошковиќ ја истакнаа важноста на членството на Македонија во НАТО за стабилноста и напредокот на целиот регион.
Шекеринска се сретна и со заменичката генерален секретар на НАТО Роуз Готемолер со која разговараа за актуелните состојби во нашата земја во пресрет на самитот на НАТО во јули. Готемолер ја истакна поддршката на Република Македонија во процесот на зачленување во НАТО и го поздрави 20-процентното зголемување на силите на АРМ во мисијата „Одлучна поддршка“. Готемолер изрази задоволство од посветеноста на Владата и Министерството за одбрана на реформите и ги поздрави чекорите на Македонија на планот на добрососедските односи.
Министерката за одбрана имаше средба и бугарскиот колега Красимир Каракачанов на која ја истакнаа важноста од добрососедските односи во регионот во разрешувањето на меѓудржавните спорови и разменија искуства од областа на реформските процеси кои ги спроведува Владата на Република Македонија. Каракачанов ги поздрави напорите на нашата земја и ја истакна поддршката на Република Бугарија за забрзување на патот на Македонија кон евроатлантските интеграции.
Утре министерката Шекеринска, во завршниот дел од Конференцијата ќе има средба со министерот за одбрана на Литванија Раимундас Кароблис и со Волфганг Ишингер, домаќинот и претседавач на 54-тата Минхенска безбедносна конференција. вј/20:30