Здружението на инженери бара во Буџетот за 2025 година да се предвидат средства за изградба на „Чебрен“
Здружението на инженери денеска преку соопштение побара од надлежните во Буџетот за 2025 година да се предвидат средства за почеток на изградбата на реверзибилната хидроцентрала Чебрен, позната како „Проект Чебрен“.
Во барањето доставено и до медиумите, се вели дека во изминатите две децении, овој проект постојано се вклучуваше во изборните програми на најголемите политички партии, како ВМРО-ДПМНЕ, која во својата програма за 2024 година повторно го потврди овој проект како приоритетен. Со поддршката на 400 илјади гласачи и 58 пратеници во Собранието, ВМРО-ДПМНЕ има јасен мандат од граѓаните да го реализира ветувањето за Чебрен. Покрај тоа, и опозициската СДСМ, заедно со ЗНАМ, исто така го поддржуваат овој проект, што покажува широк политички консензус за неговата важност.
Здружението на инженери посочува дека проектот Чебрен е стратешки и од клучно значење за енергетската независност и безбедност на Република Македонија. Со инсталиран капацитет од најмалку 333 MW, тој е планиран да ја обезбеди потребната флексибилност и стабилност на енергетскиот систем, особено по затворањето на термоелектраните РЕК Осломеј и РЕК Битола, кое согласно „Зелената транзиција“ се очекува да се случи до 2028 година. Изградбата на Чебрен не е само инвестиција во инфраструктурата, туку во енергетскиот и економскиот суверенитет на Македонија, што ќе ја намали зависноста од увоз на електрична енергија и ќе го зајакне домашниот производствен капацитет.
„Во текот на 2023 година, нашето Здружение водеше успешна кампања против доделувањето на концесијата за Чебрен на странски компании, особено спротивставувајќи се на предлогот да биде доделена на грчкиот конзорциум PUBLIC POWER CORPORATION. Ние инсистираме на тоа дека овој капитален проект треба да се изгради и управува од страна на Македонија, што ќе гарантира долгорочни економски и социјални придобивки за нашите граѓани“, се нагласува во барањето.
Затоа ги повикуваме Владата и Министерството за енергетика да ја преземат иницијативата и да ги вклучат потребните финансиски средства за „Проектот Чебрен“ во Буџетот за 2025 година. Неопходно е да се избегнат понатамошни одложувања и несигурност кои само дополнително ќе ги зголемат трошоците и ќе ја отежнат енергетската транзиција.
Со ова обраќање, исто така одговараме на неодамнешните тврдења во медиумите дека нашето Здружение е „замолчено“ поради политички притисоци. Нашето единствено мото е заложба во интерес на државата и граѓаните, а не во корист на која било политичка партија. Ние бараме вистински инвестиции во енергетскиот сектор, кои ќе обезбедат долгорочна стабилност и развој.
Време е Владата да ги исполни своите ветувања и да го започне проектот кој е од витално значење за иднината на нашата земја, се нагласува во барањето на здружението Инженери на Република Македонија.