Вонредна состојба поради суша во Барселона. Нема миење автомобили, полнење базен…
На жителите на Каталонија во североисточна Шпанија ќе им биде забрането да мијат автомобили и да ги полнат празните базени според серијата мерки објавени денеска за да се олесни досега најголемата суша во регионот, пренесува АП.
Шефот на регионалната влада на Каталонија, Пере Арагонес, најави вонредна состојба поради суша, откако акумулациите во медитеранскиот регион паднаа под 16 отсто од капацитетот.
Најлошата суша на овој век во Каталонија
„Каталонија страда од најтешката суша во овој век, никогаш не сме се соочиле со толку долга и интензивна суша откако се бележат врнежите“, рече Арагонес на прес-конференција.
Мерките ќе погодат околу 6 милиони луѓе во 200 села, градови и населби, вклучувајќи го и регионалниот главен град Барселона, вториот по големина град во Шпанија.
Што значат итни мерки против суша?
Според правилата за вонредни состојби, локалните власти бараат жителите да ја намалат потрошувачката на вода во домаќинствата за 5 отсто од 210 литри на 200 литри по лице дневно. На земјоделците им беше наложено да ја намалат потрошувачката на вода во земјоделството до 80 отсто.
Жителите на Барселона не можат да ги полнат своите приватни базени и да ги перат своите автомобили. Покрај тоа, илјадници жители кои живеат во мали заедници зависат од бунари кои се суви со месеци.
Гуалба, село со околу 1.500 жители, на еден час возење северно од Барселона, нема вода за пиење од декември. Тогаш локалната акумулација падна толку ниско што водата стана невозможна за пиење и добра само за перење алишта и садови. Повеќето жители мораат да возат до друг град за да купат флаширана вода.
Предупредувања за климатски промени
Пиринејскиот полуостров е најсув во последните 1.200 години, според студијата од 2022 година. Ова ги принуди властите во Каталонија да размислат за носење вода во Барселона со брод.
Оваа мерка беше усвоена и во 2008 година, кога нивото на резервоарите падна на близу 20 проценти и работеа помалку постројки за дестилација.
„Мислам дека не сме свесни што доаѓа“, изјави за АП една жителка по име Џоан Торент, мислејќи на климатските промени. „Луѓето не сакаат да слушнат за недостатокот на вода. Според мене, луѓето треба да бидат повеќе свесни за проблемот“, рече таа.