Војната го потисна стравот од короната, луѓето се опуштија. Но пандемијата и натаму трае

Германија бележи рекорден број на заразени и покрај надежите дека пандемијата полека ќе помине. Дали народот ја потисна короната војната во Украина, па се опушти? Психолозите велат дека тоа не би било невообичаено.

Некаде под насловите за војната во Украина, речиси без големо внимание на јавноста, помина веста дека во Германија во последните 24 часа во саботата се регистрирани рекордни 240.000 инфекции со корона. Во неделата инциденцата отиде на 1.526 – толку многу луѓе се заразени на 100.000 жители во последните седум дена. И ова се само познати инфекции.

Мора да се признае, добрата вест е што бројот на луѓе во болниците е помал од претходните бранови, но околу 250 луѓе умираат од или со корона секој ден.

Дирк Курбјувајт, новинар на „Шпигел“, дури смета дека е можно бројот на заразени во Германија да расте – поради војната во Украина. „Две години општеството беше фиксирано на короната, што секако придонесе за сузбивање на инфекциите. Пандемијата не можеше да се заборави, медиумите беа преполни со неа“, пишува тој во едиторијалот на порталот на овој неделник.

„Сега короната главно исчезна од медиумите. Војната е речиси единствената вест. И јас речиси заборавив на пандемијата последниве денови. Логично е да се претпостави дека тоа се рефлектира во однесувањето. Кој не мисли на короната, посветува помалку внимание. Фактот дека Омикрон е многу помалку опасен од Делта секако игра улога. Се чувствуваме побезбедни“, додава Курбјувајт.

Слично вели и психологот Елизабет Рафауф: „Короната нѐнаправи немоќни во последните години и ни одзеде многу. Ние сме скршени од тој мал невидлив непријател“, изјави таа во интервју за порталот web.de.

„Од почетокот на војната, одеднаш гледаме конкретни слики од тенкови, ракети и луѓе кои умираат. Доживуваме конкретно насилство. Оваа бруталност ја чувствуваме како поинаква, почувствителна форма на закана“, додаде таа. Таа вели дека војната барем несвесно се споредува со пандемија, па таа не изгледа толку страшно.

„Се фокусираме на она што е најемотивно и најинтензивно за нас. Во моментов тоа е војната“, продолжува Рафауф. „Чувствуваме страв дека наскоро можеме самите да ги доживееме ужасите на војната – тоа е егзистенцијален страв. За споредба, короната во голема мера го загуби својот првичен ужас, сето она што беше туѓо и непознато“.

Тоа што бројките повторно растат е спротивно на најавите на германските власти кои пред десетина дена соопштија дека врвот на омикронскиот бран е поминат. „Ситуацијата е повторно критична“, рече министерот за здравство Карл Лаутербах во петокот.

„Ситуацијата е објективно многу полоша од расположението на граѓаните и на добар дел од политичарите“, предупредува социјалдемократскиот министер, кој стана познат по тоа што повика на претпазливост за време на пандемијата. Сега тој стравува дека многумина мислат дека короната е минато, но не е.

Во најголем дел, ова беше спонзорирано од политиката. Во февруари, претставниците на федералните и покраинските власти одлучија постепено да ги укинат мерките. Од 19 март треба да се укинат речиси сите мерки, со исклучок на носењето маски во затворени простории.

Комбинацијата на релаксација и зголемен број во жариштата како Келн е особено очигледна. Во почетокот на март овде се одржуваа традиционални карневалски свечености. Иако карневалската поворка беше забранета, таа сепак се славеше во угостителските објекти и приватните настани, а резултатот е видлив по бројот на заразени.

На тоа, како што информираат од Институтот Роберт Кох, треба да се додаде нова, уште позаразна подваријанта БА.2, која моментално преовладува меѓу новозаразените.

Министерот Лаутербах апелира до властите во покраината да не го применуваат договореното олеснување на мерките, особено во жариштата. Прашање е дали некој ќе го слуша. (Дојче веле)