(Видео) Отворен стационарот „Лајка“ – во Скопје има 1.970 кучиња

Денеска во употреба се пушти Јавното претпријатие за грижа за заштита на бездомните животни – Лајка.

Лајка е комплетно нов стационар, уреден и опремен по сите светски стандарди, кој располага со 200 засебни апартмани обезбедени со подно греење.

Во рамките на Лајка се спроведува тестирање, вакцинирање, стерилизирање/кастрирање и чипирање на секое од кучињата.

Лајка располага со две операциони сали, оддел за интензивна нега, тријажен дел и постоперативен простор со 20 легла, салон за нега на кучињата, СОС линија, како и специјално изградениот Парк за интеракција, преку кој кучињата кои биле жртви на траума низ игра и забава добиваат прилика да стекнат навики за ресоцијализација.

„Дополнително, во рамки на стационарот овозможивме и едукативен центар во кој најмладите ќе можат да добијат едукација, како и прилика за вдомување на некое од кучињата во Лајка. Со овој проект, наша цел е Лајка да прерасне во првото место на кое ќе помислат граѓаните кои сакаат да вдомат куче, и истовремено да се потрудиме сите здрави и способни кучиња да најдат дом кој го посакуваат, затоа што секое куче заслужува втора шанса“, рече градоначалникот на Скопје, Петре Шилегов.

[🔴Во живо] Прес-конференција за отворањето на ЈП Лајка

Posted by Град Скопје on Среда, 14 октомври 2020

Градоначалникот Шилегов рече дека проблемот со бездомните кучиња системски ќе го решаваат, со што ќе се намали бројот на бездомни кучиња на улиците, а и бројот на граѓани каснати од кучиња.

„Ова не е и не може да биде работа само на Градот, затоа во изминатиот период работевме интензивно во соработка со Агенцијата за храна и ветеринарство. Ги чипиравме домашните миленици, ќе влеземе во процес на чипирање на животните скитници со цел да биде тој третман да биде што е можно подобар“, додаде Шилегов.

Овој концепт е добар за да се почне со широка акција на вдомување на кучињата.

Директорката на Лајка, Тина Петрушевска, рече дека стационарот почнал да се реконструира на 19 јули лани, и дета тоа бил долг процес, но работата е квалитетно завршена. Иако,  периодов не работеле, дневно добивале по 30 повици од граѓани за дислоцирање кучиња.

„Сепак, треба да се знае дека стационарот е транзит зона. Тука се носат заловените кучиња, им се прават крвни анализи, кастрација и стерилизација, се микрочипираат со кој кој содржи податок за општина од каде се заловени и се враќаат во истата општина“, вели Петрушевска.

Таа појасни дека мапирани се сите кучиња на територија на Град Скопје и има 1.970 кучиња. Можеби изгледа дека има повеќе, но тоа е така, затоа што се собираат во чопори, а нивна задача е да се разбијат чопорите, за граѓаните да се чувствуваат безбедно.(Б.Б.)