Во Игнатиево ќе биде промовиран првиот бугарски авион F-16 Block 70

Софија – Првиот бугарски ловец F-16 Block 70 ќе биде пречекан денеска со свеченост во Третата воздухопловна база во селото Граф Игнатиево, соопшти бугарското Министерство за одбрана.

На настанот, како што пренесува БТА, ќе присуствуваат министерот за одбрана Атанас Запрјанов и началникот на Генералштабот, адмирал Емил Ефтимов. Ќе присуствуваат и заменик-помошникот секретар за одбрана на САД задолжен за НАТО и Европа, Дејвид Бејкер, вршителката на должност амбасадор на САД во Бугарија, Сузан Фалатко, како и Мајкл Шумејкер, генерален менаџер на компанијата „Локхид Мартин“. Поканети се и претставници на државните институции и други гости.

Првиот авион F-16 Block 70 за бугарските Военовоздухопловни сили (ВВС) е двосед и е наменет и за обука и за борбена употреба. Тој пристигна на 2 април во базата во Граф Игнатиево, откако на 31 март ја напушти производствената линија на „Локхид Мартин“ во Гринвил, Јужна Каролина.

Прелетот до Бугарија се одвиваше во две етапи – прво преку Атлантикот до Шпанија, во група со два авиони наменети за словачките ВВС, а потоа од Шпанија до Бугарија. Авионската операбилност ќе започне по неговото техничко и летачко приемно тестирање од страна на бугарските ВВС.

Обуката на инженерско-техничкиот персонал ќе продолжи во САД со едноседот F-16 Block 70 со број 311. Овој авион, заедно со уште шест кои се дел од првиот договор со „Локхид Мартин“, ќе бидат префрлени во Бугарија до крајот на 2025 година. Според Министерството за одбрана, бугарските ВВС ќе располагаат со цела ескадрила F-16 Block 70 до крајот на 2027 година, кога се очекува испорака на уште осум авиони од вториот договор со Локхид Мартин.