ВЛЕН тврди дека ДУИ прави зделки со Левица

Според ВЛЕН, „договорот“ бил испланиран од пратеникот Кренар Лога, пратеник и висок функционер на ДУИ, во договор со лидерот на Левица, Димитар Апасиев, и генералната секретарка на партијата, Јована Мојсовска. Во рамки на овој план, тврди ВЛЕН, Мојсовска била истурена како „изненадувачки“ кандидат во Струга, со цел да ги собере гласовите на македонскиот блок и да ја спречи победата на Ќира уште во првиот круг.

„Ова е срамна зделка, доказ дека за ДУИ власта е поважна од достоинството на Албанците,“ велат од ВЛЕН, додавајќи дека соработката со партија која гради политичка кариера врз, како што велат, „албанофобија“, е „гробно предавство“ кон граѓаните на Струга.

Коалицијата повикува јавноста да не потпаѓа под сценарија креирани во „мрачни ходници“ и бара одговори: „Што добија Лога и Апасиев за оваа зделка? Продажба на Струга? Спречување на промената? Продолжување на власта која 20 години ја дави Струга во корупција и криминал?“

ВЛЕН уверува дека, и покрај „валканите договори“, Менди Ќира на 19 октомври ќе победи во Струга, затоа што „волјата на граѓаните не се купува, не се заплашува и не се запира со лажни политички зделки“.