Владејачката партија на Гренланд планира да одржи гласање за независност по општите избори

Владејачката партија на Гренланд, Сиумут, планира да одржи гласање за независност по општите избори следниот месец, пренесува Ројтерс. Ова прашање стана итно откако американскиот претседател Доналд Трамп изрази интерес за купување на островот, а Гренланд, кој е полуавтономна територија во рамките на Кралството Данска, вчера распиша општи избори за 11 март.

Клучните прашања во предизборната кампања ги вклучуваат аспирациите на Гренланд за независност и нејзиниот однос со Данска и Соединетите Држави, особено во светлината на постојаните изјави на Трамп дека сака да го „добие“ овој стратешки важен остров. Гренланд беше данска колонија до 1953 година, а денес има широка самоуправа.

Партијата Сиумут, која е дел од двопартиската коалициска влада на Гренланд, планира да користи член од законот од 2009 година со кој Гренланд доби поголема автономија, вклучително и право да преговара за целосна независност, изјави денеска за Ројтерс политичката портпаролка на партијата Дорис Јенсен.

Таа рече дека Гренланд мора да стане независна држава за да може да преговара за сопствената иднина. „Додека нашата земја не добие статус на независна држава, нашите можности за официјално учество во преговорите ќе бидат ограничени“, рече таа.

Лидерот на партијата Сиумут, Ерик Јенсен, за данскиот телевизиски канал ДР изјави дека очекува гласањето за независност да се одржи „во следниот изборен период“, но не даде попрецизен рок. Изборите се одржуваат на секои четири години.

Сите пет политички партии во парламентот се изјаснија против Гренланд да стане дел од САД.

Анкетата објавена минатата недела покажа дека 85% од Гренланѓаните се противат на таквото сценарио, а речиси половина од испитаниците сметаат дека интересот на Трамп е закана. Гренланд, кој е богат со неискористени минерални ресурси, во голема мера зависи од рибарството и финансиските субвенции од Данска за нејзината економија.

Јенсен рече дека секоја одлука за независност мора да се донесе со целосно разбирање на нејзините последици. „Одлуката мора да биде донесена врз основа на информации, за населението да не се сомнева во последиците. Имаме социјална држава која мора да функционира. Има и економски аспекти кои исто така мора да ги земеме предвид“, рече тој.

Социјалдемократската партија Сиумут моментално има 10 мандати во парламентот со 31 место. Третата по големина партија во земјата, Налерак, исто така изјави дека сака веднаш да ги прекине врските со Данска.