(Видео) Нов инцидент на Винисиус: Постигна гол и славеше со Мурињо, а потоа шок! ВАР го поништи голот и го исклучи Бразилецот

Натпреварот од 8. коло на шпанската Ла Лига помеѓу Реал Мадрид и Виљареал (1:0) при резултат 1:0 го одбележа несекојдневна ситуација во вториот дел. Домашните поведоа во 62. минута со голот на Јано Диоманде, што беше негов прв гол во дресот на Реал. Десет минути подоцна мрежата ја затресе и Винисиус Јуниор кој влезе во игра во 52. минута. Бразилецот го прослави голот, а му честиташе и Жозе Мурињо, но прославата беше прекината со интервенција на ВАР.

Судијата Исидро Дијаз беше повикан да ја прегледа снимката. По проверката, утврдено е дека Винисиус го повлекол за коса противничкиот играч во акцијата која му претходела на голот. Поради тој потег, судијата Дијаз не само што го поништи голот, туку и му покажа директен црвен картон на бразилскиот напаѓач. Наместо водство од 2:0, Реал остана со играч помалку на теренот.

Винисиус Јуниор е еден од оние фудбалери чиј талент тешко може да се оспори, но чие однесување често го засенува она што го прави на теренот. Неговите провоцирачки постапки, жалење пред судиите и бурните реакции создаваат впечаток на играч кој речиси секој натпревар го претвора во лична пресметка.

Во јануари 2024 година, по победата на Реал од 4:1 против Барселона во финалето на шпанскиот Суперкуп, тој ги испровоцира противниците покажувајќи им го резултатот, а неколку месеци подоцна на мечот против Мајорка се судри со Пабло Мафе и судијата. Врвот дојде во јануари 2025 година, кога против Валенсија го турна во лице голманот Столе Димитриевски, поради што беше исклучен и потоа суспендиран на два натпревари.