Трамп ретроактивно ги намали царините за европските автомобили

Администрацијата на претседателот Доналд Трамп  соопшти дека  ретроактивно ќе важи царинската стапка од 15% за автомобили и автоделови од ЕУ. Царината е со важност од 1 август.

Во известување од Федералниот регистар се наведува дека го измениле распоредот на царините за да го спроведат рамковниот договор постигнат со ЕУ во јули, со кој се намалуваат царините на 15% за поголемиот дел од увозот од ЕУ, вклучително и автомобилите.

За автомобилската индустрија, одлуката значи намалување на царините од 25% на 15% , потег што ги ублажи тензиите во секторот кој чекаше повеќе од еден месец за официјална потврда. 

Во известувањето од САД, исто така, се наведени стотици производи од ЕУ кои се ослободени од новите царини на Трамп, вклучувајќи природни ресурси како што се плута што недостасува во САД, сите авиони и делови за авиони, како и генерички фармацевтски производи и нивните состојки и хемиски прекурсори.

Истовремено администрацијата во САД најави дека од 1 октомври ќе стапат во сила нови увозни царини, насочени кон неколку индустрии, како дел од напорите за заштита на американската економија и национална безбедност.

Според најавата: 100% царина ќе се воведе на брендирани и патентирани лекови, 25% царина на тешки камиони, 50% царина на кујнски елементи и 30% царина на тапациран мебел.

Трамп изјави дека увозот на тешки камиони претставува „нефер странска конкуренција“ и оти новите царини ќе користат на американски компании како Peterbilt, Kenworth и Freightliner (во сопственост на Daimler).

„Потребни ни се финансиски здрави и силни производители на камиони – пред сè поради националната безбедност“, рече Трамп.

Американската стопанска комора ја повика администрацијата да се воздржи од царините, посочувајќи дека петте главни извозници на камиони – Мексико, Канада, Јапонија, Германија и Финска – се сојузници или блиски партнери на САД, кои не претставуваат безбедносна закана.

Мексико, како најголем извозник на средни и тешки камиони во САД, најмногу ќе биде погоден. Исто така, Stellantis, матичната компанија на Chrysler, во Мексико произведува Ram камиони, а Volvo Group гради нова фабрика за тешки камиони вредна 700 милиони долари во Монтереј, чиј почеток на работа се очекува во 2026 година.

Што се однесува до лековите, 100-процентната царина ќе важи за сите бренд или патентирани фармацевтски производи доколку компанијата нема започнато изградба на фабрика во САД.

Фармацевтската асоцијација на САД предупреди дека оваа мерка може да биде штетна, бидејќи 53% од состојките во лековите што се користат во САД се веќе произведени внатрешно, а остатокот доаѓа од Европа и сојузнички земји.

Царините на мебел, вклучително кујнски и бањски елементи, Трамп ги оправда со „огромни нивоа на увоз кои ги уништуваат локалните производители“.