Трајанов бара да се стави крај на бесконечните амандмански расправи

Лидерот на Демократскиот сојуз, Павле Трајанов, достави иницијатива до претседателот на Собранието Талат Џафери, во која предлага како да се подобри  работата на Собранието во услови на пандемија. Според него, работата на Парламентот станува се посложена и потешка, при што пратениците и натаму се изложени на огромен ризик од инфекција. Досега над 30 пратеници биле заразени од вирусот КОВИД-19. Поради тоа, Трајанов предлага:

-Да се зголемат здравствените заштитни мерки во Собранието, посебно во салата за пленарни седници и просториите каде се одржуваат седници на комисиите. Во оваа насока предлага преку Собранискиот канал да се информираат пратениците кога започнува седницата, кога има пауза, до кога трае и кога продолжува со работа. Понатаму, во салата да бидат присутни пред се пратениците кои се јавиле за збор или имаат реплики, а другите текот на седниците да го следат од своите канцеларии.

-Да се донесе Одлука без да се менува Деловникот за работа на Собранието, со која ќе се овозможи онлајн работа. Одлуката да биде од времен карактер до создавање на услови за нормална работа на Собранието.

-Да се измени Деловникот за работа на Собранието со што амандманската расправа ќе се ограничи најмногу до 10 дена, освен за прашања сврзани со националните и стратешките интереси на РСМ.

-Да се обезбедат безбедни здравствени услови за работа на ресторанот (за пратениците од внатрешноста), да се обезбеди сопствен возен парк и слично се со цел Собранието да може непречено да ја остварува својата Уставна функција.

„Предлагам да се формира работна група составена од претставници од сите парламентарни групи и независни пратеници, која ќе направи анализа на функционирањето на Собранието и ќе предложи решенија.Во суштина иницирам да се подобрат условите за работа и функционалноста на Собранието, при што претседателот, кој е прв помеѓу еднаквите, во работата да го почитува Деловникот за работа на Собранието , да не се впушта во долги и непотребни елаборации и да има ист однос спрема сите пратеници“, порача Трајанов.