Теја Дора со „Рамонда“ ќе ја претставува Србија на Евросонг во Малме (видео)

Белград– Во финалето на српскиот избор за песна на Евровизија победи песната „Рамонда“ во изведба на Теја Дора. Претставничката беше избрана меѓу шеснаесетте натпреварувачи, врз основа на гласовите на жирито и публиката.

Таа ќе ја претставува Србија на Евровизија во Малме во мај. Второто место го зазеде Бресквица, која исто така беше еден од фаворитите за победа, а на третото место е Зорја.

Насловот на нејзината песна има посебна симболика. Станува збор за цвет со виолетови ливчиња, кој е симбол на Денот на примирјето во Првата светска војна, кој се слави на 11 ноември.

Пред самото финале на натпреварувањето беше многу тензично во обложувалниците. Бресквица со песната „Гнездо орлово“ долго време го држеше првото место, а потоа падна на третото место. Првото место тогаш го зазеде Теја Дора, која и странските фанови на Евровизија ја сметаа за фаворит за победа.

По победата на Теја Дора, на Твитер почнаа да се слеваат реакции. На крајот, некои сѐ уште не се задоволни од победникот, но многумина не го кријат своето воодушевување.

Теја Дора или Теодора Павловска е родена 1992 година во Бор во источна Србија. Со музика почнала да се занимава уште како дете, а до сега компонирала и пишувала песни за бројни српски ѕвезди. На 17-годишна возраст заминала во САД да студира музика и години подоцна работела во музичката продуцентска куќа „ARKTKT Publishing LLC“ во Њујорк. Теја Дора е автор и на неколку песни кои се појавуваат во серијата „Јужен ветер“.

Во март минатата година, Теја Дора ја објави песната „Џанум“, која по низа околности стана ултимативен хит на ТикТок. На Јутјуб, таа песна има над 75 милиони прегледи.