Таткото на Михаилова се крие од прогон во Бугарија и дава изјави за телевизија

Симеон Михаилов, осуден за обид за убиство и лице по кое Македонија и натаму трага за издржување затворска казна од 12,5 години, се појави на бугарска телевизија, каде беше претставен како татко на Ива Михаилова од Кочани.Со тоа се потврди веста на „Независен“ од вчера, дека осудениот на 13 години затвор во случајот „Детонатор“ кој со години се крие од правдата е татко на Ива Михаилова која бара да се лечи во странство  и не се чувствува виновна за загинаттото лице во сообраќајката што според полицијата ја предизвикала.  

 Во дел од бугарските медиуми случајот подолг период се претставува и низ призмата на нејзиното бугарско самоопределување и тврдењата дека поради тоа е изложена на притисок. 

Симеон Михаилов е осуден за обид за убиство на Драганчо Стоименов во скопската населба Аеродром, во случај поврзан со кочанската група „Детонатор“. Тој бил суден и за злосторничко здружување и насилство, односно има дебело криминално минато зад себе. Во текот на постапката Михаилов избегал од Македонија, по што бил пронајден во Италија, по што бил екстрадиран во Македонија и се наоѓал во притвор. Само неколку дена пред правосилноста на пресудата, Михаилов бил пуштен да се брани од слобода. Пет дена подоцна, пред пресудата да стане правосилна, повторно избегал. Оттогаш се шпекулираше дека престојува во Бугарија.

Првично му била изречена доживотна казна затвор, која во понатамошната судска постапка била намалена, а Македонија сега го бара за издржување на правосилно определената затворска казна од 12,5 години. Потерницата по Михаилов и натаму е активна.

Неговото појавување во бугарски медиум повторно го отвора и прашањето за можноста тој да биде достапен за македонските институции, особено доколку поседува  бугарско државјанство. Бугарија, во пракса, не ги екстрадира сопствените државјани само врз основа на барање од друга држава, па евентуалното извршување на македонската пресуда би зависело од конкретните правни механизми и постапки меѓу двете земји.

Во меѓувреме, неговата ќерка Ива Михаилова бара судот да ѝ го врати пасошот за да може да ја напушти Македонија.Судот засега не го дозволува тоа, со цел да се обезбеди нејзино присуство на рочиштата во постапката во која треба да се утврди дали има кривична одговорност за сообраќајната несреќа, а поради опасност од бегство. На првото рочиште Михаилова се изјасни дека не е виновна.

Семејното досие на Михаилова сепак не може да се сведе на бугарските корени како причина за неправеден третман, бидејќи Симеон Михаилов има повеќе кривични досиеја и убиството го сторил како дел од група. Ова пак покажува колку е очајна официјална Софија кога се става во функција на тежок криминалец, па и го чува и го штити, откако претходно бранеше човек (Пендиков) кој јавно порачуваше дека е Македонец, па кога му затреба бугарски пасош за да се заштити од одговорност – преку ноќ стана Бугарин. Протестот вчера во Софија за Ива Михаилова покажа колку е патетично сценариото за  „право за лечење“ што наводно и е ускратено, за некакви можни последици од повреда на кичма во иднина. Според снимките од притестот на него едвај присуствуваа триесетина луѓе од кои поголем број новинари.   

„Новините“ јави дека писмо до претседателката Гордана Сиљановска Давкова околу Михаилова испратила Илијана Јотова, но не добила никаков одговор, а осумте пратеници што присуствуваа на судењето не можеа да објаснат дали со тој гест не сакаат да влијаат на процесот, уште повеќе што таму имаше реални жртви – семејствата на повредените и загинатиот во сообраќајката. Поради јасната намера да се исполитизира случајот, има очигледно воздржување да се коментираат барањата и писмата на Софија, бидејќи е долго искуството со ваквите политички сценарија правени според упатствата од бившиот СССР и Владимир Путин.  

 На рочиштето на 31 август, вештакот Зоран Јошевски, на чиј извештај се потпира обвинителството, сведочеше дека автомобилот на Михајлова влегол, според неговата анализа, приближно 90 сантиметри во сообраќајот од спротивната насока и дека тој не открил докази што укажуваат на соодветно движење на другото возило.

Одбраната ја оспорува оваа верзија. Две стручни мислења што ги презентираше го припишуваат, според она што беше презентирано во постапката, влегувањето во сообраќајот од спротивната насока на другото возило. Исто така, постои несогласување околу брзината: обвинителството пријави 84 км/ч со ограничување од 60, додека одбраната тврди, повикувајќи се на документ од надлежниот орган за сообраќај, дека на местото на судирот ограничувањето било 90 км/ч. Се очекува експертите од одбраната да бидат сослушани на следното рочиште.

Случајот почна да добива пошироко значење поради рестриктивните мерки изречени врз Михајлова по несреќата. Патните документи ѝ беа конфискувани, а таа самата не може да ја напушти земјата. 23-годишната девојка, која претрпе сериозни повреди на ‘рбетот, бара да патува во Бугарија на лекување и на 31 август изјави пред судот дека нејзината физичка состојба се влошува. Според неа, вкупно осум барања за дозвола за патување од медицински причини се одбиени.

Основниот суд во Кочани го отфрли последното такво барање на 7 август, а Апелациониот суд во Штип ја потврди одлуката на 20 август. Бугарската страна се повикува на мислење на лекарскиот одбор на Универзитетскиот клинички центар во Скопјe, според кое потребната терапевтска интервенција не е достапна во Северна Македонија и мора да се спроведе во странство. Во исто време, адвокатот на Михајлова, Насер Рауфи, тврди дека рестриктивните мерки изречени на 8 октомври 2025 година не се разгледани од судот по службена должност, туку само по барања од одбраната. Ова е став на одбраната, а не судски наод, но покренува специфично прашање во врска со времетраењето и пропорционалноста на мерките.

Бугарското Министерство за надворешни работи официјално го покрена случајот кај северно македонските власти, изразувајќи забелешки за начинот на кој беа евалуирани медицинските мислења. На 11 август, бугарската претседателка Илијана Јотова испрати писмо до северно македонскиот претседател Гордана Силјановска-Давкова, во кое предложи или испраќање бугарски лекари во земјата за медицинска проценка или обезбедување третман таму. Јотова подоцна изјави дека не добила одговор и објави дека има намера да го покрене прашањето кај генералниот секретар на Советот на Европа.

Политичкото присуство стана уште поочигледно на седницата на 31 август, кога осум бугарски пратеници од четири политички партии беа во судницата во Кочани заедно со претставници на бугарската амбасада. Тие рекоа дека ја следат постапката, фокусирајќи се на правото на фер судење и пристапот на Михајлова до третман.

Македонската влада се обидува да ја одвои политичката дебата од судскиот процес. ува да ја одвои политичката дебата од судскиот процес. Министерот за надворешни работи, Тимчо Муцунски, го опиша случајот како кривична постапка под јурисдикција на независното судство, нагласувајќи дека владата не може да се меша или да коментира за начинот на работа на судовите. Тој посочи и дека пристапот до здравствениот систем е овозможен без разлика дали некој се соочува со кривична пријава.

На 13 август, бугарските европратеници упатија заедничко писмо до раководството на Европската унија, вклучително и претседателката на Европската комисија Урсула фон дер Лајен, претседателот на Европскиот совет Антонио Коста, високата претставничка Каја Калас и комесарката за проширување Марта Кос. Тие побараа внимателно следење на судскиот процес и случајот да се земе предвид при оценувањето на владеењето на правото во контекст на пристапниот процес на Северна Македонија. Европската комисија не ги усвои жалбите на бугарската страна. Портпаролот, сепак, рече дека Комисијата ги следи поединечните случаи кога тие можат да придонесат за поширока проценка на функционирањето на правдата и владеењето на правото.

Следното рочиште е закажано за 28 септември, кога се очекува да продолжи испитувањето на вештаците. (С.Ј.)