Стево Ќирков веќе директорува со Скопје ЗОО, а бил осуден за криминал со животни

Од петокот, на вработените во скопската Зоолошка градина како нов директор им се претставува Стево Ќирков, кој беше советник од редовите на ВМРО-ДПМНЕ во Советот на Град Скопје во мандатот на Данела Арсовска. Ќирков закажува состаноци во директорската канцеларија со вработените на Зоолошката, за плановите за подобрување на условите во неа, пишува денешен СДК.МК.  Медиумот испратил прашање до кабинетот на градоначалникот на Скопје Орце Ѓорѓиевски, дали е назначен нов директор на Зоолошката градина, но одговор не добиле. Денеска Ќирков им изјавил дека уште не е официјално назначен на функцијата, но тоа треба да се случи деновиве.

„Јас сум изборот на градоначалникот Ѓорѓиевски за оваа функција. Во Зоолошката градина одам за да се запознаам со тимот и колегите со кои ќе работам откако ќе бидам официјално назначен, по што ќе одржам и средба со новинарите“, рекол Ќирков во телефонски разговор.

Инаку одамна се знае дека во Основниот кривичен суд Скопје има пресуда со која лицето С. Ќ. е осудено за измама во 2016 година. Како што стои во пресудата, тој е осуден на затворска казна од 6 месеци, која нема да се изврши доколку во рок од една година не стори друго кривично дело. Како што стои во пресудата, С. Ќ. продавал куче за кое лажел дека имал педигре, по што оштетеното лице го тужел и го добил случајот.

На нашето прашање дали е осуден за измама со продажба на кучиња направена во 2016 година, Ќирков ни рече дека тоа не е точно, дека тој случај бил оспорен и ни прати документ за неосудуваност. Документот е изваден на 12 јули 2025, му требал за работа во Хрватска. Според законот, условната осуда се брише од казнената евиденција по една година откако ќе помине времето за проверка ако во тој период лицето не стори ново кривично дело.

На најавата за именување реагираше и Мери Јорданоцска, до скоро истражувачки новинар. 

 

„Лицето Стево Ќирков (Стефан Кирков) во 2018 година со пресуда К бр. 1205/18 е осудено на условна казна, токму за измама со животни, односно измамува луѓе продавајќи им кучиња за 600 евра, но не им дава педигре, иако претходно им го ветува.Во пресудата, според сведоштва од Кинолошкиот сојуз пренесени од оштетениот, може да се прочита и дека истото лице било познато по тоа дека вршело слични измами и на други лица. Поминато е долго време, па оваа пресуда е избришана од казнената евиденција на Ќирков, но тоа не значи и дека делото измама не е сторено.