Спасовски: Полицијата подготвена за спасувачки операции
– По повод Денот на полицијата во рамки на Алпинистичко-спасувачките показни вежби „Водно 2019“ денеска припадници на полицијата изведоа две показни вежби на падините на средно Водно, со што ја прикажаа подготвеноста за спасувачки операции.
Во рамки на активностите беше изведена спасувачка акција на заглавени патници во кабини на жичница со примена на алпинистички техники, специјална опрема за работа на жичница, како и приод и евакуација со хеликоптер, демонстрирани од припадници на алпинистичкиот тим од Единицата за специјални задачи и хеликоптер со екипаж на Воздухопловната eдиница за полициски операции.
– Преку вакви презентации и овозможуваме на јавноста да се запознае со секојдневните активности на полицијата како и потенцијалите на Министерството во остварувањето на своите законски надлежности и должности. И денеска се покажа одличната подготвеност на полициските службеници и нивното ефикасно дејствување во корист на граѓаните, истакна министерот за внатрешни работи Оливер Спасовски.
Министерството за внатрешни работи имајќи ја предвид важноста на овој вид специјализирани тимови и служби, како за полициски така и за спасувачки намени, потенцира, дава континуирана поддршка за нивното надградување и модернизирање притоа издвојувајќи значителни финансиски средства за обука и опремување.
– Во изминатиот период за потребите на алпинистичкиот тим на Единицата за специјални задачи набавена е нова алпинистичка опрема и системи за спасување. Во соработка со Амбасадата на Република Франција во неколку наврати организирана е обука на припадниците на алпинистичкиот тим на ЕСЗ со експертски тимови од Франција, рече Спасовски.
Министерот Спасовски денеска им додели плакети на членовите на оперативниот штаб при МВР кој беше формиран за неодамнешната посета на папата Франциск.
