Скопје и Софија ги почнуваат разговорите за тунелот кај Деве Баир
Ексертски комисии и претставници на ЕУ ќе се сретнат на 16 јули во Брисел
Се очекува Македонија и Бугарија да излезат од вербалните препукувања и конечно да се договорат за изградбата на пругата меѓу Скопје и Софија, особено заедничкиот тунел кај Деве Баир.
Македонија и Бугарија ќе имаат средба на експертско ниво во присуство на Европската комисија за тунелот на 16 јули во Брисел. Постои начелна согласност тунелот да се гради заеднички за што би се побарал грант од ЕУ како симболика за поврзување меѓу двете земји, соопшти вечерва вицепремиерот и министер за транспорт Александар Николоски.
Во гостување на Сител рече дека средбата со неговиот бугарски колега Гроздан Караџов, што се одржа викендот во рамки на Форумот на министри за транспорт во Турција, била долга и содржајна и била постигната согласност за трите отворени на кои инсистираше македонската страна за изградбата на пругата. Според Николоски, овој инженерско-проектантски проблем преминал во политички и му порачал на бугарскиот коелга дека не смее да се дозволи тоа да се случува во иднина.
Николоски вели дека Македонија не сака Скопје да се поврзе со Крива Паланка, туку со Софија, а од таму со Бургас и Варна. Тој рече дека Македонија ќе го заврши својот дел од работата, а тоа треба да го направи и Бугарија од своја страна – да ја модеринизира железницата.
„Веќе постои согласност дека тунелот мора да се гради заеднички, за тоа ќе има средба во Брисел на 16 јули помеѓу експерти од Македонија, Бугарија и Европската комисија. Второ, ќе се потпише и документ, како заедничка декларација. Ќе работиме да се изработи што побргу, со тимови на највисоко ниво, од двете влади. Понатаму Бугарија јасно кажа дека ќе инвестира милијарда и 500 милиони евра на потегот од Софија до Ѓуешево и Деве Баир, граница со Македонија, што е значајно ветување и многу поразлично од она што беше претходно“, рече Николоски.