Сиљановска го помилува Ѓоко Поповски – осуден за „мерцедесот“

Поранешниот помошник  за јавни набавки на министерот во МВР, Ѓоко Поповски, излегува на слобода по 9 години поминати во затвор. Одлуката за делумно помилување е потпишана од македонската претседателка, Гордана Сиљановска Давкова, со што Поповски е ослободен од понатамошно издржување на остатокот од казната.

Поповски беше осуден во предметите „Триста“ и „Тенк“ на Специјалното јавно обвинителство (СЈО), поврзани со злоупотреби во јавните набавки. Во одлуката за помилување се наведува дека се делумно ослободува од понатамошно извршување на неиздржаниот дел од затворската казна.

Еден од симболите на случајот „Тенк“ — луксузниот „Мерцедес“, за кој Поповски беше осуден, сè уште е во сопственост на Службата за општи и заеднички работи при Владата. Претходната влада предводена од СДСМ најавуваше продажба на возилото, со образложение дека е луксузно и скапо за одржување, но тоа не беше реализирано.

Во Одлуката што беше објавена денес во Службен весник, и за која Сиљаниовска не испрати соопштение за јавноста, се помилувани осум лица, од кои четири целосно, а четири од делумно извршување на казната. Меѓу нив има лица со извршени тешки кривични дела. Во првата одлука што ја донесе на почетокот на мандатот таа го помилува и екс градоначалникот на Битола, Владимир Талевски.