Што се случува со „Епл“?

„Епл“, компанија позната со децении по својата стабилност и низа производи што ја дефинираа технолошката индустрија, доживува големи превирања на врвот. За помалку од една недела, три члена на извршниот тим најавија дека ќе си заминат, клучниот директор за дизајн го презеде Мета, а се повеќе се шпекулира дека извршниот директор Тим Кук исто така се подготвува да си замине, пишува Си-Ен-Ен.

Промените доаѓаат во клучен момент, бидејќи критичарите предупредуваат дека „Епл“, некогашниот лидер, сега заостанува во новиот голем бран – вештачката интелигенција. За една од највредните компании во светот, промените во раководството би можеле да значат и пресврт во начинот на кој ги замислува, дизајнира и создава производите што милиони луѓе ги користат секој ден.

„Единствениот заклучок што можеме да го извлечеме од ова е дека влегуваме во време на зголемена нестабилност за ‘Епл’“, вели Роберт Сигел, долгогодишен инвеститор во ризичен капитал и предавач на бизнис школата Стенфорд.

Акциите на „Епл“ пораснаа за околу 12 отсто оваа година, што е значително забавување од добивката од 30 отсто минатата година. Компанијата не одговори веднаш на барањето за коментар.

Кој заминува?

Само оваа недела беа објавени неколку клучни луѓе како планирани заминувања. Лиза Џексон, потпретседател за животна средина, политика и социјални иницијативи, се пензионира следната година. Истото важи и за генералниот советник Кејт Адамс и Џон Џанандреа, виш потпретседател за машинско учење и стратегија за вештачка интелигенција. Во меѓувреме, Алан Дај, потпретседател за дизајн на кориснички интерфејс, се сели во „Мета“, каде што ќе стане главен директор за дизајн. Порано оваа година, Џеф Вилијамс, исто така, се повлече од функцијата главен оперативен директор.

„Епл“ веќе пронајде замени. Генералниот советник на Мета, Џенифер Њустед, ќе стане нови генерален советник на „Епл“. Тимовите за животна средина и социјални иницијативи ќе му поднесуваат извештаи на оперативниот директор Сабих Кан, додека новиот потпретседател за вештачка интелигенција ќе биде Амар Субрамања, кој доаѓа од „Мајкрософт“.

„Епл“ не е единствениот технолошки гигант кој претрпува структурни промени. „Мета“ неодамна објави префрлање на инвестициите од проектот Метаверс кон очила за вештачка интелигенција, „Амазон“ отпушти 14.000 луѓе во октомври за да го забрза напредокот во вештачката интелигенција, а „Гугл“ ги спои своите тимови за хардвер и софтвер минатата година за подобро да ја интегрира вештачката интелигенција во производите.

Сепак, за „Епл“, позната по својата тајност и тесно поврзана корпоративна култура, таков јавен егзодус е невообичаен.

„Ова е спротивно на типичната култура на ‘Епл’. Но, тие мора да го „отстранат фластерот“, рече Ден Ивс, раководител на технолошки истражувања во „Ведбуш секјуритис“. „Бидејќи стратегијата за вештачка интелигенција беше невидлива и ќе го дефинира наследството на Кук, или како тој се справува со ова поглавје“.

Иднина и предизвици

Преуредувањето на раководството доаѓа во време кога се поставуваат прашања за иднината на компанијата. „Епл“ го одложи големото надградување на својот гласовен асистент Сири, кое требаше да го доближи до конкурентите како ЧетЏиПиТи на ОпенаАИ и Џемини на „Гугл“. Ажурирањето е одложено за следната година, додека другите надградби на вештачка интелигенција на ајфон Мек и ајпад беа минимални оваа година. Покрај тоа, Вижн про (Vision Pro), скапи слушалки и првата нова категорија на производи од деценискиот Епл воч (Apple Watch), останува нишен производ.

Во меѓувреме, „Мета“ „Гугл“ „Самсунг“ и „ОпенАИ“ објавија значајни откритија во вештачката интелигенција оваа година – од паметните очила Ray-Ban Display на „Мета“ до слушалките со Џемини на „Гугл“ и „Самсунг“, па сè до влегувањето на ОпенАИ во онлајн купувањето и веб-прелистувачите.

Вол Стрит сака одговори за стратегијата за вештачка интелигенција на „Епл“. За време на јулскиот повик за приходите, аналитичарите ја прашаа компанијата за улогата на Сири и заканата што ја претставуваат вештачките чет-ботови. Еди Кју, виш потпретседател за услуги, дури изјави за време на сведочењето на антимонополското сослушување на „Гугл“ дека луѓето „можеби нема да имаат потреба од ајфон за 10 години“.

Сега Алан Дај, кој е главно лице на дизајнерското студио откако Џони Ајв си замина во 2019 година, заминува за „Мета“. Во исто време, самиот Ајв му помага на ОпенАИ да го создаде нивниот прв хардверски производ. Преминувањето на Дај во „Мета“ претставува „подиректна закана за ‘Епл’“ во споредба со другите заминувања, според Џо Тигеј, менаџер за портфолио во „Рејшенел еквити армор фунд“.

Ајфон е сè уште гигант

И покрај притисоците, продажбата на ајфон 17 е силна и се очекува да продолжи да расте. Според „Каунтерпоинт рисрч“, оваа година, за прв пат од 2011 година, „Епл“ треба да го надмине „Самсунг“ по бројот на испорачани паметни телефони. Компанијата е исто така една од ретките, заедно со гигантите за вештачка интелигенција „Нвидиа“ и „Мајкрософт“, чија пазарна капитализација надмина 4 билиони долари.

Сигел верува дека промената не е секогаш лоша работа, особено за време на транзицијата на технолошкиот сектор кон вештачка интелигенција. Привлекувањето нови луѓе може „да понуди поинаква перспектива кога компанијата е заклучена во еден начин на размислување и работење“, рече тој.

И тоа би можело да биде токму она што му е потребно на „Епл“, бидејќи некои аналитичари предупредуваат дека на компанијата ѝ снемува време да направи големи чекори во вештачката интелигенција.

„Не можете да ја имате четвртата индустриска револуција и да гледате забава со вештачка интелигенција низ прозорец однадвор“, заклучи Ивс. „Јасно е дека им е потребна огромна промена во лидерството“.