Што донираа семејствата на Анте Поповски и Матеја Матевски на Музејот на македонската борба?

31/05/2024 09:42

Предмети од личните фондови на истакнатите македонски академици Анте Поповски и на Матеја Матевски , како дар од нивните семејства, сега се дел од музејската колекција на Музејот на македонската борба во Скопје. Бројните гости од културниот живот на земјата, и академици кои можеа да се избројат на прсти, синоќа, на свеченоста, по повод музејскиот омаж на бардовите на македонската литература и култура, ги видоа нивните изложени лични документи и дипломи, награди, признанија, ордени, фотографии, други документи за идентификација, потоа документи за професионалната дејност како лични ракописи, кореспонденција, реферати, нацрти, концепти, уметнички слики од Коле Манев и Вана Урошевиќ, рачни и џебни часовници…

Со овој чин, Музејот ги збогатува фондовите со подарени материјали за еминентните претставници на втората генерација македонски книжевници, чии дела оставија силен печат врз општествената и културната сцена во втората половина на 20. век.

Активностите се дел од градењето блиски релации со јавноста преку прибирање значајни материјали поврзани со патот до македонска државност и слобода, започнати од отворањето на музејот до денес.

На промоцијата се обратија Ана Китановиќ, в.д. директор и автор, м-р Данијела Трајкова Крстиќ, виш кустос и автор, и претставници на семејството Поповски и Матевски.

Денко Матевски, синот на Матеја Матевски

„Убавината на настанот, вечерва е дополнително поголема, бидејќи сите нас не обединува пишаниот збор во творештвото на Поповски и Матевски, како претставници на една „поетска генерација која ги изгради естетските фундаменти за развојот на модерната македонска литература“. Искрено верувам дека книжевното и културното наследство на Поповски и Матевски ќе бидат инспирација за секој посетител, да зачекори во едно не толку далечно време, на места во кои нивното величество зборот и логосот и денес одекнуваат како ехо укажувајќи ни дека (цитат од А. Поповски) „ мајчиниот јазик и јазикот со сета своја широчина е централна поента на она што сме ние како човештво“ , истакна синоќа во своето обраќање, Данијела Трајкова – Крстиќ.

Мартин Матевски, синот на Матеја Матевски

Музејските омажи се замислени како блиски средби на посетителот со поетите, академиците, но и личностите Анте Поповски и Матеја Матевски, раскажани на автентичен начин преку музејски предмети кои композициски се поставени во тематски целини.

Донацијата од личните фондови на Анте Поповски содржи 46 предмети, ракописи, одликувања, фотографии… – Александар Поповски, еден од синовите на Анте Поповски

Анте Поповски (1931- 2003) е македонски книжевник, поет и есеист, публицист, сценарист, продуцент, преведувач, општественик и академик. Како член на МАНУ и Светската академија на поезијата на Организацијата за образование, наука и култура на Обединетите нации (УНЕСКО), се профилира како еден од афирматорите на македонска книжевна и културна сцена на национално, но и на меѓународно ниво.

Уметничкото дело портрет на Матеја Матевски од Вана Урошевиќ

Матеја Матевски (1929- 2018) е меѓу најзначајните личности во македонската современа литература и култура, поет на европската лирика, есеист, новинар, преведувач, литературен и театарски критичар. Истакнат општественик и член на МАНУ од 1970 со значаен придонес во областа на книжевноста и културата на Македонија. (Л.С.)