Шефот на „Визер“ предупредува: Проблемите со патувањето допрва ќе следат
Јожеф Варади ги обвинува и работниците кои штрајкуваат за влошување на летните проблеми
Нема брзо решение за проблемите на воздухопловната индустрија, вели извршниот директор на „Визер“, Јожеф Варади.
Шефот на унгарската авиокомпанија рече дека воздухопловната индустрија и владите ја потцениле брзината на закрепнување од Ковид-19 и во интервју за „Политико“ тврдеше дека „неверојатно некорисните“ штрајкови на работниците ги влошиле проблемите.
Бројот на летови низ Европа значително се зголеми откако беа отфрлени ограничувањата за патување, при што сообраќајот ова лето се очекува да достигне повеќе од 90 проценти од нивоата пред ковид пандемијата.
Но, недостигот на персонал и штрајковите низ индустријата ги оставија патниците да се соочат со долги редици, одложувања и откажани летови, додека авиокомпаниите и аеродромите се тркаат да ги покријат празнините. Лондонскиот аеродром „Хитроу“ оваа недела им порача на авиокомпаниите да ја паузираат продажбата на билети и да постават дневен лимит од 100.000 патници.
„Схипхол“ во Амстердам, исто така, постави слични ограничувања за патниците. Нискобуџетната компанија „Изиџет“ укина околу 10.000 од своите летови ова лето.
„Мислам дека никој не треба да очекува ненадејно подобрување“, рече Варади, додавајќи дека авиокомпанијата прави промени во своите шеми на летање за да се обиде да избегне нарушување.
„Нема да биде совршено, така што мислам дека нема да имаме одлично лето. Но, правиме сѐшто можеме за да се осигураме дека имаме повеќе безбедни мрежи во системот“, рече тој.
„Визер“ се соочи со помалку проблеми од некои од неговите ниски ривали, но Варади рече дека целата индустрија – како и владите – ја потцениле брзината на закрепнувањето.
Има недостиг низ целиот сектор, при што многумина во индустријата се жалат на должината на процесот на безбедносно овластување, што може да потрае и до 16 недели за нови вработувања.
Но, Варади го посочи недостигот во управувањето со воздушниот сообраќај како долгорочен проблем. „Тоа е многу тешко подрачје да се обучуваат луѓето. Тоа е две до три години, така што нема брзо решение“, рече тој.
Тој ја префрли вината на националните влади, за кои рече дека требало да направат повеќе за да се подготват за рестартирање.
„Управувањето со воздушниот сообраќај е државна организација, така што владите требаше да направат многу подобро во однос на предвидувањето на она што доаѓа и да се осигураат дека нивните системи се во можност да ја задоволат побарувачката“, рече тој, во интервјуто за „Политико“.